Komisaun Anti Korrupsaun Timor-Leste nian komemora aniversáriu dalimak
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 24 fulan-fevereiru tinan 2015
Komisaun Anti Korrupsaun Timor-Leste nian komemora aniversáriu dalimak
Wainhira Komisaun Anti Korrupsaun (KAK) harii iha loron 22 fulan-fevereiru tinan 2010, hahuu sira nia funsaun ho vizaun ida ne’ebé loloos:Timor-Leste, Estadu demokrátiku ida ne’ebé ho kultura ida forte ne’ebé lasimu korrupsaun ba interese no prosperidade povu nian”. Hodi konkretiza vizaun ida ne’e ninia misaun mak “kombate korrupsaun liuhosi prevensaun, edukasaun no investigasaun”.
Hosi Idea hirak ne’ebé mak hala’o, Komisaun buras nu’udar instituisaun ida ne’ebé funsiona ho edifísiu ida, pesoál, rekursu no investigadór sira. Hahuu tinan 2010, KAK hala’o ona servisu di’ak iha investigasaun ba korrupsaun, hodi identifikasaun área sira ne’ebé fraku, no hanorin populasaun kona-ba saida mak korrupsaun no saida mak korrupsaun halo.
Atu komemora aniversáriu dalimak Komisaun Anti-Korrupsaun nian, maka hala’o workshop ida kona-ba tema “Kombate hasoru korrupsaun husi pontudevista jurídiku nian”, iha sesta loron 20 fulan-fevereiru, iha Ministériu Negósiu Estranjeiru no Kooperasaun. Komisáriu Komisaun Anti-Korrupsaun, Adérito António Pinto Tilman, no Prezidente Tribunál Rekursu nian, Guilhermino da Silva, no Primeiru-Ministru, Dr. Rui Maria de Araújo, maka halo parte iha painél oradór sira nian, ne’ebé iha parte lorokraik nian inklui mós Prokuradór-Jerál Repúblika, Dr. José Ximenes, Provedór Direitus Umanus no Justisa, Dr. Silvério Pinto, no Vise-Prezidente Komisaun A Parlamentu Nasionál nian, Arãao Noel.
Primeiru-Ministru Dr. Rui Araújo haktuir ba partisipante sira: “Ita nia povu uluk terus maka’as no sakrifika sira nia an ba independénsia la’ós atu ohin-loron haree fali ninia nasaun monu fali iha korrupsaun ita nia Estadu nian. Tanba razaun hirak ne’e maka ita presiza garante katak korrupsaun iha Timor-Leste labele kompensa. Ita tenke fó sai ho klaru katak ema ne’ebé pratika hahalok korrupsaun nian sei hetan risku boot. Ita labele foti medida ne’ebé hobalu-hobalu de’it satán fó deskulpa ka aseita korrupsaun. Ita labele husik korrupsaun tau nia abut iha ita nia sosiedade. Tanba ne’e ita presiza Komisaun Anti-Korrupsaun ida ne’ebé forte, ne’ebé iha kbiit atu foti medida sira ne’ebé firme no iha podér atu mantein Governu ne’e onestu no responsável”.
Nia garante mós katak “Governu ida ne’e haree loloos Komisaun Anti-Korrupsaun no servisu ne’ebé mak hala’o ona ”hodi kompromete fó “ba Komisaun Anti-Korrupsaun apoiu no koperasaun ne’ebé maka nia presiza hodibele kombate korrupsaun iha ita nia nasaun ho efetividade. Primeiru-Ministru husu komisaun “atu kontinua sira nia servisu di’ak, laós de’it iha investigasaun situasaun korrupsaun nian, maibé mós iha dezenvolvimentu asaun sira hodi previne korrupsaun, liu-hosi kampaña edukasionál sira no asaun espesífika sira hamutuk ho servisu no área sira ne’ebé mak iha risku bo’ot liu.
Komisáriu Komisaun Anti-Korrupsaun nian, Adérito Tilman, afirma katak “iha toleránsia zero” relasiona ho korrupsaun no presiza ema hotu-hotu nia dedikasaun. Nia rekoñese mós esforsu, dedikasaun no progresu komisaun nian iha tinan lima ikus ne’e nia laran no hato’o nia hakarak atu harii futuru ida ho baze ba liafuan sira iha leten nu’udar aliserse.
Atu lee diskursu Primeiru-Ministru Dr. Rui Maria de Araújo nian, klike iha ne’e.
Website Komissau Anti-Korrupsaun nian: http://www.cac.tl
