Prezidente Repúblika fó sai Dr. Rui Maria de Araújo nu’udar Primeiru-Ministru Timor-Leste nian
Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Dili, loron 11 fulan-fevereiru tinan 2015
Prezidente Repúblika fó sai Dr. Rui Maria de Araújo nu’udar Primeiru-Ministru Timor-Leste nian
Gabinete Prezidente Repúblika ohin fó sai ona katak Primeiru-Ministru foun Timor-Leste nian maka Dr. Rui Maria de Araújo.
Komunikadu ida fó sai hahú kalan ida ne’e, iha Gabinete Prezidente Repúblika, hateten:
“S.E. Prezidente Repúblika, ohin, konklui audisaun ho partidu sira–ne’ebé iha asentu parlamentár kona-ba indijitasaun ba Primeiru Ministru foun.
Hanesan rezultadu hosi audisaun sira-ne’e, Prezidente Repúblika aseita proposta hosi CNRT, nu’udar partidu votadu liuhotu iha eleisaun lejislativa ikus liubá, ne’ebé indijita Dr. Rui Maria Araújo ba kargu nu’udar Primeiru Ministru.
Prezidente Repúblika sei simu Primeiru Ministru indijitadu iha loron hirak tuirmai atu diskuti kona-ba konstituisaun VI Governu Konstitusionál nian. Tuirmai, Governu ne’e sei hetan pose hosi Prezidente Repúblika previzivelmente iha semana ida-ne’e nia laran”.
Hanesan komunikadu ne’e hatete, prevee katak Dr. Rui Maria de Araújo sei hetan pose ofisialmente hamutuk ho membru sira hotu Governu Konstitusionál VI foun, iha semana ne’e nia rohan, liuhosi serimónia ida iha Dili. To’o iha ne’ebá Primeiru-Ministru no Governu nafatin hala’o sira ninia knaar atu asegura jestaun lorloron nian, hodi hala’o asaun hirak ne’ebé importante ba administrasaun Estadu nian, ba interese públiku no Governu Tranzisaun nian.
Dr. Rui Maria de Araújo ne’ebé formadu iha Medisina iha tinan 1994, hosi Universidade Udayana, Bali, Indonézia no remata mós Mestradu ida iha Saúde Públika, Polítika Saúde nian, Jestaun no Finansiamentu Saúde nian, iha Universidade Otago, Dunedin, iha Nova Zelándia, iha tinan 2001.
Nu’udar Ministru Saúde iha Administrasaun Tranzitória Nasoens Unidas nian iha Timor-Leste (UNTAET iha tinan 2001-2002 no iha Governu Konstitusionál Timor-Leste I (dahuluk) iha tinan (2002-2006). Iha Governu Konstitusionál da-II (daruak) iha tinan (2006-2007) no iha Governu Konstitusionál da-III (datoluk) iha tinan (2007), Dr. Rui Maria de Araújo okupa kargu hanesan Vise-Primeiru-Ministru no Ministru Saúde. Hanesan mós Asesór Seniór ba Ministru Saúde no Asesór Sénior Jestaun Servisu Korporativu iha Ministériu Finansas Timor-Leste nian.
Daudaun ne’e Prezidente Repúblika fó sai naran Dr. Rui Maria de Araújo nian no sira sei ba hala’o servisu hamutuk hodi halo ramata tiha kompozisaun ba Ezekutivu foun ne’e.
Alterasaun hirak ne’ebé prevee ona ba estrutura Governu nian atu hadi’a liután servisu sira no haburas implementasaun Planu Estratéjiku Dezenvolvimentu nian. Proposta sira atu halo modifikasaun inklui mós hamenus dimensaun Governu nian atu nune’e forma Ezekutivu ida ki’ik, ne’ebé efisiente liu no efikás, hodi hatama ema foun ho kompeténsia no hatudu iha esperiénsia hodi fó biban ba jerasaun foun sira atu ukun.
Portavós hosi Governu Konstitusionál V (dalima) nian, Ministru Estadu Agio Pereira, hateten katak “Ho aseitasaun Prezidente Repúblika ita hatene loloos ona katak kona-ba dalan ne’ebé ita atu la’o ba oin. Iha deliberasaun hirak ne’e hotu, no iha Governu oin mai, ita sei fó prioridade ba povu, serbi ba povu, hodi fó onra ba ita nia istória luta nian no hodi harii futuru ida pozitivu no di’ak liu ba ita nia Nasaun foun ne’e”.
