Sorumutu estraordináriu Konsellu Ministrus loron 23 fulan-Janeiru tinan 2015

Prezidénsia Konsellu Ministrus

V Governu Konstitusionál

..............................................................................................................................

Díli, Loron 23 Fulan-janeiru Tinan 2015

Komunikadu Imprensa

Sorumutu estraordináriu Konsellu Ministrus loron 23 fulan-Janeiru tinan 2015

Konsellu Ministrus hala’o sorumutu estraordináriu iha Sexta-feira ne’e, loron 23 fulan-janeiru tinan 2015, iha edifísiu ida hosi Madres Dominicanas [Madre Dominikana] sira nian, iha Pante Macassar [Pante-Makasár], kapitál distritu/munisípiu Oe-Cusse Ambeno [Oekusi-Ambenu], no aprova tiha ona diploma tolu:

1. Rezolusaun Governu ne’ebé aprova dezagregasaun dotasaun orsamentu nian ba Autoridade da Rejiaun Administrativa Espesiál Oe-Cusse Ambeno no Zona Especial Ekonomia Social Mercado de Oe-Cusse Ambeno e Ataúro [Zona Espesiál Sosiál Merkadu Oekusi Ambenu no Ataúru] 

Governu foin lalais ne’e kria ona, kondisaun legál hirak ne’ebé presiza, meiu no rekursu sira, atu nune’e Autoridade no Órgão Região Administrativa Especial Oe-Cusse Ambeno [Autoridade Órgaun Rejiaun Administrativa Espesiál Oekusi Ambenu] bele hahú ona hala’o sira nia funsaun no atividade tuir kompeténsia ne’ebé sira iha.

Nune’e, maka Konsellu Ministrus, liuhosi diploma ida ne’e, nia fó ba Autoridade Região Administrativa Especial Oe-Cusse Ambeno [Autoridade Rejiaun Espesiál Oekusi Ambenu] kompeténsia atu fahe no aloka dotasaun orsamentu nian ne’ebé nia simu tuir Orsamentu Jerál Estadu (OGE) nian ba 2014, ne’ebé prevee ona iha Lei n.u 2/2014 loron 5 fulan-fevereiru, ba Projeto Zona Especial Economia Social Mercado nian ho ninia valór USD 20.500.000 (osan dolar amerika millaun ruanulu- rihun-atus-lima), nune’e mos dotasaun orsamentu nian ne’ebé nia simu tuir Orsamentu Jerál Estadu (OJE) ba 2015  ne’ebé prevee ona iha Lei n.u 6/2014 loron 30 fulan-dezembru, ba Autoridade Região Administrativa Especial Oe-Cusse Ambeno no Zona Especial de Economia de Mercado de Oe-Cusse Ambeno e Ataúro nian, ho valór USD 81.930.000 (osan dolar amerika millaun ualunulu-resin-ida, rihun-atus-sia-tolunulu), tuir prevee ona iha dokumentu sira kona-ba apoiu ba OJE tinan 2015 nian.

2. Efetivasaun transferénsia funsaun, meiu no rekursu sira ba Autoridade Região Administrativa Especial Oe-Cusse Ambeno

Konsellu Ministrus, liuhosi diploma ida ne’e, transfere funsaun, meiu no rekursu finanseiru, materiál no umanu nian sira, ne’ebé prevee ona iha Rezolusaun Governu n.u 25/2014, loron 1 fulan-setembru, no konsidera katak kria tiha ona kondisaun sira atu hala’o knaar hirak nia simu kona-ba Rejiaun Administrativa Espesiál Oe-Cusse Ambeno no kompeténsia sira hosi ninia órgaun deliberativu no ezekutivu sira.

Revoga tiha ona rezolusaun Governu nian n.u 25/2014, loron 1 fulan-setembru, no dizolve tiha ona mós komisaun tranzisaun ba Oe-Cusse Ambeno. Maske nune’e, Governu konsidera katak sei persiza asegura akompañamentu ba aplikasaun hosi meiu no rekursu hirak ne’ebé transfere ona, durante tinan ida, tanba ne’e maka kria Komisaun Koordenasaun no Akompañamentu ida entre Governo Central [Governu Sentrál] no Autoridade Região Administrativa Especial Oe-Cusse Ambeno e Zona Especial de Economia de Mercado.

Komisaun Koordenasaun no Akompañamentu – ne’ebé prezide hosi Prezidente Autoridade nian, maibé iha kazu sorumutuk sira ne’ebé mak partisipa hosi Primeiru-Ministru, komisaun ne’e sei prezide rasik hosi Primeiru-Ministru – bainhira integra hotu membru Governu oin-oin no membru Autoridade sira no tenke hala’o sorumutuk baibain dala rua, iha tinan 2015 nia laran, katak sorumutuk dahuluk atu halo ninia programa servisu nian no ida ikus atu-hodi halo balansu ikus nian ba mandatu ne’e rasik.

Mandatu Komisaun nian sei hotu iha loron 31 fulan-dezembru tinan 2015, maibé bele revoga ka hanaruk tan liuhosi rezolusaun Governu nian.

3. Rezolusaun Governu nian ne’ebé aprova nomeasaun ba membru sira Autoridade Região Administrativa Especial Oe-Cusse Ambeno nian

Konsellu Ministrus mak iha kompeténsia, liuhosi Rezolusaun Governu nian no tuir proposta prezidente Autoridade nian hodi hili Membru sira Região Administrativa Oe-Cusse Ambeno nian. Nune’e liuhosi diploma ida ne’e, Konsellu Ministrus hili membrus sira Autoridade Rejiaun Administrativa Oe-Cusse Ambeno nian maka Arseno Paixão Bano, Leónia da Costa Monteiro no Pedro de Sousa Xavier.

Prezidente Autoridade nian sei hola inisiativa atu propoin nomeasaun ba membru sira seluk hosi órgaun ne’e hahú ho kompozisaun ida ho elementu hitu.

   Ba leten