Heineken Asia Pasifik asina akordu formál Investimentu nian ho Governu Timor-Leste
Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Dili, loron 10 fulan-janeiru tinan 2015
Heineken Asia Pasifik asina akordu formál Investimentu nian ho Governu Timor-Leste
Governu Timor-Leste asina ona iha loron 8, fulan-janeiru, iha Ministériu Negósius Estranjeirus no Koperasaun, akordu formál ida kona-ba investimentu ho Heineken Asia Pacific. Heineken hakarak atu, iha tinan ida ne’e nia laran, hahú harii fábrika ida iha besik Dili, ne’ebé sei fabrika bebida oin-oin, inklui serveja, refrijerante no bee. Projetu ne’e prevee ona atu bele funsiona iha tinan rua mai nia laran, sei harii postu servisu diretu nian hamutuk 200 no postu servisu indiretu nian hamutuk 800.
Iha ninia deklarasaun sira ba komunikasaun sosiál hafoin hala’o tiha Serimónia Asinatura, Administradór Ezekutivu Heineken Asia Pacific nian, Roland Pirmez ko’alia “Timor-Leste iha ambiente ida kapás tebes ba investimentu estranjeiru”. Administradór Ezekutivu ko’alia kona-ba prosesu negosiasaun ne’ebé hala’o ona ho Governu no nia hateten kona-ba insentivu fiskál no kontratu leasing ba durasaun naruk nian sira hanesan fatór hirak pozitivu ba Heineken, nu’udar produtór da-tolu serveja nian ne’ebé boot liu iha mundu, atu hola desizaun kona-ba investimentu ida ne’e.
Vise-Primeiru-Ministru, Fernando La Sama de Araújo, ko’alia dehan projetu ida ne’e hatudu katak Timor-Leste oras ne’e hetan konfiansa hosi empreza internasionál boot sira. Vise-Primeiru-Ministru hateten katak “Planu Estratéjiku Dezenvolvimentu Timor-Leste nian ba 2011-2030 prevee ona katak sustentabilidade futuru nasaun nian depende ba setór privadu ida nia organizasaun ne’ebé tasak” no dehan katak Governu “sei fó prioridade ba hakiak ambiente negósiu no investimentu nian ida ne’ebé bele apoia hodi hamoris no haboot negósiu”.
Sekretária Estadu ba Apoiu no Promosaun Setór Privadu, Veneranda Martins, fó-hatene katak iha loron 1, fulan-janeiru tinan ida ne’e nian, Governu Timor-Leste estabelese ona Ajénsia Espesializada Investimentu nian [www.inest-tl.com], liu-liu atu bele “sai hanesan katalizadór hodi dada investimentu sira, ne’ebé bele diversifika ekonomia no hamenus dependénsia ba minarai”.
Administradór Ezekutivu Heineken nian hateten “katak empreza sira fiar ba poténsia Timor-Leste nian” no nia hatudu entuziasmu atu sai nu’udar “parseiru ida ba prazu naruk.” Investimentu ho osan dolar hamutuk millaun 40 hosi Heineken define tiha ona atu bele hetan rezultadu ida pozitivu liuhosi harii postu traballu sira, dezenvolve kompeténsia lokál sira, hamenus importasaun sira no diversifika ekonomia Timor-Leste nian.
