………………………………………………………………………………………………………………
Díli, Loron 21 Fulan-novembru Tinan 2014
Komunikadu Imprensa
Sorumutu estraordináriu Konsellu Ministrus nian iha loron 21 fulan-novembru
Konsellu Ministrus hala’o sorumutu estraordináriu iha sesta ne’e, loron 21 fulan-novembru tinan 2014, iha sala sorumutuk Konsellu Minisntrus nian, iha palásiu Governu, iha Dili, no aprova ona diploma rua:
1. Rezolusaun Governu nian ne’ebé halo aprovasaun ba Akordu Investimentu nian ho Heineken Asia-Pacific Pte. Ltd.
Projetu atu harii fábrika serveja nian iha Timor-Leste ne’ebé Heineken Asia Apcific Pte. Ltd propoin, prevee investimentu ida ho folin dolar amerikanu millaun haatnulu ba leten.
Iha sekuénsia husi avaliasaun ba proposta ne’e, ne’ebé halo husi Komisaun Investimentu nian ida kompostu husi instituisaun oin-oin, ne’ebé ninia rezultadu aprezenta tiha ona ba Konsellu Ministrus iha sorumutu loron 17 fulan-setembru nian, Governu hakotu hodi halo aprovasaun ba Akordu Investimentu nian ida ho Heineken. Tuir akordu ne’e Heineken sei hetan benefísiu fiskál balun ne’ebé prevee tiha ona iha Lei Investimentu nian.
2. Dekretu-Lei ne’ebé regulamenta Fundu Espesiál Dezenvolvimentu nian
Fundu ne’e uza atu finansia, ho forma ida ne’ebé efisiente, segura no transparente, implementasaun husi projetu lubun ida ne’ebé inklui iha planu dezenvolvimentu Rejiaun Administrativa Espesiál Oe-Cusse Ambeno nian.
Konsellu Ministrus analiza mós aprezentasaun haat:
1. Projetu kona-ba Investimentu Pelican Paradise
Sekretáriu Estadu Apoiu no Promosaun Setór Privadu hato’o ona ba Kosellu Ministru, projetu investimentu empreza internasionál nian, ne’ebé ho sede iha Singapura, Pelican Paradise Holdings Timor-Leste, ba konstrusaun no esplorasaun kompleksu otél fitun lima nian ida, entre Dili ho Tibar, ne’ebé ho investimentu hamutuk osan dólar millaun 310.
Tamba iha projektu ne’e otél ida ho kuartu 492, jináziu, restaurant, spa, sentru konvensaun ne’ebé bele simu ema rihun ida Atus Lima, kampu golfe, zona komersiál no zona rezidensiál.
Iha faze harii kompleksu otélnian ne’e, investidór kalkula katak sei loke postu servisu diretu hamutuk Rihun Ida Atus Lima, hodi pursentu 70% to’o 80% timor-oan mak sei prenxe. Bainhira konstrusaun remata ona no funsiona ona, investidoór prevee atu kria tan postu traballu 830, ne’ebé mak 70% to’o 80% sei bele timor-oan mak sei prenxe.
2. Prosesu arbitrajem no disputa fronteira Marítimu
Miistru Petróleo no Rekursu Naturál nian hato’o tiha ona ba iha Konsellu Ministrus pontu situasaun nian ida kona-ba Prosesu Arbitrajen no Disputa Fronteira Maritimu nian sira.
3. Relatóriu Aktividade Timor GAP nian
Ministru Petróleo no Rekursu Minerál, hamutuk ho Prezidente Timor GAP E.P., hato’o tiha ona ba Konsellu Ministrus, Relatóriu hirak kona-ba aktividade empreza nian, ne’ebé hala’o iha tinan 2012 no 2013. Dokumentu sira hakerek detalladu kona-ba rekursu umanu sira, projektu hirak hala’o ona no seidauk hala’o, estudu hirak atu planeia onshore Timor-Leste nian, biban ba negósiu no parseiria nian, dezenvolvimentu indústria Nasionál Petróleo nian, áre dezenvolvimentu konjuntu mina-rai nian, no seluk tan.
4. Kalendáriu aktividade durante Prezidénsia CPLP nian
Ministériu Negósius Estranjeirus no Koperasaun hato’o tiha ona ba Konsellu Ministrus kalendáriu atividade hirak tama ona iha programa ne’ebé atu hala’o durante Prezidénsia rotativu Komunbidade País Lian Portugés nina sira (CPLP) ne’ebé Timor-Leste mak kaer (2014-2016), ne’ebé bele haree liu sorumutuk sira iha altu nível entre ministru sira hosi área oin-oin hosi país hirak ne’ebé forma organizasaun ida ne’e.