Timor-Leste kongratula Sua Exelénsia, Prezidente Joko Widodo
Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Dili, loron 20 fulan-outubru tinan 2014
Timor-Leste kongratula Sua Exelénsia, Prezidente Joko Widodo
Governu Timor-Leste kongratula Sua Exelénsia Joko Widodo, ohin loron, iha okaziaun nia simu pose nu’udar Prezidente Repúblika Indonézia dahituk.
Timor-Leste no Indonézia iha relasaun bilaterál iha aspetu oioin no riku tebes ne’ebé mak tuir previzaun sei kontinua la’o ba oin nafatin ho di’ak iha Prezidente Widodo nia ukun. Primeiru-Ministru Timor-Leste, Xanana Gusmão, afirma, foin daudaun ne’e, iha nia diskursu iha Asembeli-Jerál Nasoins Unidas katak “ba Timor-Leste, Indonézia ho nia sosiedade ne’ebé plurál no tolerante, la’ós de’it hanesan nasaun viziñu ne’ebé besik liu, maibé sai mós hanesan inspirasaun ida ba ami-nia nasaun”.
Primeiru-Ministru foin dadaun ne’e dehan mós katak “Ohin loron, Repúblika Indonézia no Repúblika Demokrátika Timor-Leste nu’udar Estadu soberanu rua ne’ebé respeita ba malu no buat ne’ebé sai hanesan baze fundamentál ba sira-nia relasaun sira kooperasun nian maka, espíritu maun-alin no prinsípiu igualdade nian, no importante liután maka valór sinseridade iha ita-nia hahalok sira ba interese ne’ebé boot liu ba ita nia Povu sira”.
Governu Timor-Leste hein ho espetativa atu dezenvolvimentu relasaun bilaterál di’ak tebetebes ne’ebé mak agora iha, bele kontinua iha Prezidente Widodo nia ukun, no hato’o ninia respeitu no felisitasaun ba Sua Exelénsia Prezidente, no ba Nasaun, iha okaziaun importante ida ba iha istória Repúblika Indonézia nian ne’e.
Xefe Estadu Timor-Leste, Sua Exelénsia Prezidente Taur Matan Ruak, reprezenta Timor-Leste iha Jakarta, iha tomada-de-pose ne’e, hamutuk ho Ministru Negósius Estranjeirus no Kooperasaun Interinu, Constâncio Pinto, nu’udar reprezentante Governu Timor-Leste nian.
