Sorumutuk Konsellu Ministrus nian iha loron 17 fulan-setembru tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 17 Fulan Setembru Tinan 2014
KOMUNIKADU IMPRENSA
Sorumutuk Konsellu Ministrus nian iha loron 17 fulan-setembru tinan 2014
Governu sorumutu loron-kuarta ne’e, loron 17 fulan-setembru tinan 2014, iha sala-sorumutuk Konsellu Ministru nian, iha Palásiu Governu, Dili, no aprova ona:
1. Dekretu-Lei ne’ebé hamoris Ajénsia Espesializada Investimentu no aprova ninia Estatutu
Diploma ida-ne’e hamoris Ajénsia Espesializada Investimentu, ne’ebé hanaran “Investe Timor-Leste”, nu’udar entidade responsável ba promosaun investimentu privadu no esportasaun nian iha rai-laran. Entidade ida-ne’e maka sei iha kompeténsia atu hasai Sertifidadu Investidór nian no sei hala’o funsaun hanesan Balkaun Atendimentu ba projetu sira investimentu estranjeiru nian iha rai-laran.
2. Dekretu-Lei ne’ebé hamoris Institutu Peskiza, Dezenvolvimentu, Formasaun no Promosaun Bambu nian
Sentru Bambu (Au) Timor-Leste nian hahú ninia atividade iha tinan 2008 no halo ona produtu oioin ho kualidade di’ak, durante tinan barak nia laran, no ninia merkadu nakloke luan ba beibeik no Institutu Apoiu ba Dezenvolvimentu Emprezariál (IADE) maka koordena. Plantasaun Au nian, iha parte ida, kontribui ona hodi hamenus dependénsia ba matéria-prima ne’e, maibé mós iha poténsia hodi aumenta área formasaun, peskiza no dezenvolvimentu Sentru nian, nu’udar motór hosi sustenta no dezenvolve rekursu umanu sira, ba nia an rasik ka ba komunidade lokál sira.
Rekoñese importánsia no susesu Sentru Bambu nian, diploma ida-ne’e fó autonomia ba nia, foti nia nu’udar organizasaun ne’ebé iha jestaun di’ak atu promove espansaun atividade, iha nível formasaun, peskiza no dezenvolvimentu nian, nomós iha nível produsaun, ne’ebé la’ós de’it ba konsumu rai laran nian, maibé, ba mós esportasaun.
3. Dekretu Governu nian ne’ebé aprova remunerasaun Komisaun Tranzisaun nian ba Oe-Cusse Ambeno
Tuir sekuénsia kriasaun Komisaun Tranzisaun ba Oe-Cusse Ambeno, ne’ebé aprova iha sorumutuk estraordinária Konsellu Ministru nian iha loron 28 fulan-agostu, diploma ida-ne’e estabelese remunerasaun no subsídiu ba membru sira-ne’ebé tama iha komisaun ne’e.
Komisaun Tranzisaun ba Oe-Cusse Ambeno jere transferénsia responsabilidade ba Autoridade Rejiaun Administrativa Espesiál Oe-Cusse Ambeno nian, kompostu hosi membru Governu sira, Prezidente Autoridade Oe-Cusse Ambeno, kolaboradór sira balu, nomós elementu sira Administrasaun Sentrál no Distritál no grupu serbisu ba pré-deskonsentrasaun nian.
Ba membru Governu, sira-nia remunerasaun define ona iha lei parlamentár, maibé, elementu sira-seluk ne’ebé serbisu daudaun iha prosesu harii Rejiaun ne’e iha fulan hirak nia laran ona, sira nia situasaun seidauk define loloos, no diploma ne’e mak sei fó solusaun ba problema ida ne’e.
Konsellu Ministru analiza mós:
1. Aprezentasaun projetu investimentu Heineken nian
Sekretaria Estadu ba Apoiu no Promosaun Setór Privadu aprezenta ona konkluzaun hirak Komisaun Investimentu nian kona-ba proposta investimentu empreza Heineken Asia Pasific Pte.Ltd iha Timor-Leste ba Konsellu Ministru.
Hatete katak atu hetan apresiasaun ba projetu ne’e, Tradinvest husu ona paresér hosi instituisaun hirak tuirmai: Ministériu Obras Públikas, Ministériu Finansas, Ministériu Justisa, Ministériu Komérsiu, Indústria no Ambiente, Ministériu Saúde, Sekretaria Estadu ba Apoiu no Promosaun Setór Privadu, Sekretaria Estadu Seguransa, Sekretaria Estadu ba Polítika Formasaun Profisionál no Empregu, no SERVE.
