Sorumutuk Konsellu Ministrus nian iha loron 19 fulan-Agostu tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 19 Fulan Agostu Tinan 2014
Komunikadu Imprensa
Sorumutuk Konsellu Ministrus nian iha loron 19 fulan-Agostu tinan 2014
Governu sorumutu loron-tersa ne’e, loron 19 fulan-Agostu tinan 2014, iha fatin-sorumutuk Konsellu Ministru nian, iha Palásiu Governu, Dili, no aprova ona:
1. Proposta nomeasaun ba kargu sira Xefe Estadu-Maiór Forsa Armada no Xefe Komponente nian sira
Konsellu Ministrus hakotu ona kona-ba lista militár sira-ne’ebé Sr. Prezidente Repúblika propoin ba kargu sira Xefe Estadu-Maiór no Komandante komponente nian sira.
Lia-hakotu ida ne’e mosu tanba Estatutu Militár F-FDTL nian sira vigora ona iha fulan-Marsu tinan ne’e. Tuir Estatutu Militár F-FDTL nian katak ezersísiu kargu sira Xefe Estadu-Maiór Jenerál F-FDTL, Vise-Xefe Estadu-Maiór Jenerál F-FDTL, Xefe Estadu-Maiór F-FDTL no Komandante Komponente nian sira, sei iha durasaun ba tempu ida ne’ebé limitadu. Ba Ofisiál Jenerál sira, sira-nia dezenpeñu ba kargu ne’e to’o tinan haat, maibé iha situasaun balu to’o tinan rua.
2. Alterasaun Dahuluk ba Dekretu-Lei n.u19/2003, Regulamentu Tarifa Portu nian sira Timor-Leste nian
Konsellu Ministrus analiza no aprova ona proposta ida hosi Ministru Transportes no Komunikasaun nian hodi altera Regulamentu Tarifa Portu sira Timor-Leste nian.
Alterasaun ida-ne’e fó-dalan katak, bele hetan autorizasaun ba pagamentu tarifa hirak ketaketak, ka ninia redusaun ka izensaun, iha kazu esepsionál sira ne’ebé fundamentadu, liuhosi Despaxu Ministru nian no hafoin rona tiha Ministériu Finansas.
Konsellu Ministru analiza, mós:
1. Proposta Konstrusaun Indústria Tratamentu Reziduu no Produsaun Enerjia
Ministériu Komérsiu Indústria no Ambiente aprezenta ona proposta ba Konsellu Ministrus kona-ba konstrusaun Indústria Reziduu no Produsaun Enerjia hosi empreza Shun Hsin.
