Timor-Leste no Indonezia realiza Jogu Fronteira

Seg. 05 maiu 2014, 19:35h
JogosSemFronteiras_PORTAL

Sekretáriu Estadu Juventude no Desportu, Miguel Manetelo, iha loron 30 Abril hasoru malu ho Ministru Juventude no Desportu Indonézia, Roy Suryo, hodi koa’lia kona-ba akordu ne’ebé asina tiha ona iha tinan 2012, inklui Jogu Fronteira.

Akordu tinan 2012 iha Palásiu Governu Timor-Leste ne’e, asina husi Ministru Juventude no Desportu (eis), Andi Malarangen no atuál Sekretáriu Estadu Juventude Desportu, Miguel Manetelo, akompaña husi Prezidente Susilo Bambang Yudhoyono no Primeiru Ministru, Kay Rala Xanana Gusmão.

Hafoin enkontru Sekretáriu Estadu Juventude no Desportu, Miguel Manetelo informa, enkontru ne’e iha ona konkordansia atu implementa ona akordu balun, hanesan jogu fronteira.

Iha orsamentu jerál Estadu tinan 2014, Governu Timor-Leste aloka ona osan dolar amerikanu $70,000.00 atu realiza atividade ne’e.

Ba nia homologu Ministru Roy Suryo, Sekretáriu Estadu husu atu halo koordenasaun ho Ministériu Justisa no Imigrasaun kona-ba oinsá fasilita komunidade sira, bele asesu ba-mai mai hodi partisipa iha jogu nee.

Entertantu Ministru Juventude no Desportu Indonézia, Roy Suryo espilka, jogu fronteira hanesan pasu importante atu hametin amizade entre Timor-Leste ho Indonézia, liuhusi atividade juventude no desportu.

Tuir planu, jogu fronteira sei involve de’it distritu sira iha fronteira, maihusi Timor-Leste iha distritu 5, mak distritu Kovalima, Bobonaro, Oe-Kussí, Ainaro no Likisá. No husi Indonezia mós iha sistritu 5, mak distritu Belu, Soe, Kefa, Atambua ho Kupang.

Aleinde jogu ba modalidade desportu, mós distritu ida-ida sei aprezenta nia kultura liuhusi kalan kultura.

   Ba leten