Inaugurasaun husi Sentru Kulturál Lospalos nian
Iha loron 1 fulan Maiu, 2014, Sekretaria Estadu husi Arte no Kultura no Ministériu Turizmu sei halo inaugurasaun Sentru Kulturál Lospalos, iha Lospalos, tuku 4 lokraik.
Programa kulturál ahutuku 9 dader, ho feira artezanatu, expozisaun, múzica no dansaa tradisionál sira.
Projetu ne'e, ho finansiamentu husi Governu Timor-Leste, mak Sentru Distritál Kulturál ne'ebé dahuluk husi Sentru sira ne'ebé Sekretaria Estadu Arte no Kultura no Ministériu Turizmu sei hala'o iha tinan hirak mai iha distritu ida idak iha país tomak.
Iha tinan sira liu ba, Sekretaria Estadu Arte no Kultura, servisu hamutuk ho ONG “Many Hands International”, autoridade lokál sira no komunidade husi Lospalos, hodi harii infraestrutura ne'ebé fo apoiu ba estudu, dezenvolvimentu no promosaun husi arte no kultura husi distritu Lautém.
Projetu arkitetura adaptasaun husi merkadu munisipál tuan husi tempu portugés ba Sentru Kulturál fo husi ONG “Many Hands International”, no iha loron inaugurasaun Sekretaria Estadu Arte no Kultura sei asina Protokolu Kolaborasaun ho ONG ne'e.
Instituisaun ne'e, ne'ebé fo apoiu ba Governu ho orsamentu, materiál sira no formasaun profisionál husi funsionáriu no joven sira husi distritu Lautém, hala'o mos investigasaun kona ba aspetu oin oin husi kultura lokál no hala'o formasaun no atividade kulturál seluk.
Sentru Kulturál Lospalos, ne'ebé depende husi Sekretaria Estadu Arte no Kultura, sei fo kontribuisaun ba dexentralizasaun husi asesu ba kultura, hodi kultura bele to'o duni ba subdistritu, suco no aldeia sira husi distritu Lautém. Sentru Kulturál Lospalos sei sai fatin di'ak hodi hala'o espetákulu kulturál sira no iha mos sala sira hodi hala'o espozisaun, formasaun no atividade kulturál seluk. Iha tempu badak sei hetan mos biblioteka ho asesu ba Internet, estudiu gravasaun no kafé/restaurante.
Sentru Distritál Kulturál hola parte husi Politika Nasionál ba Kultura husi Governu no sentru sira ne'e hanesan fatin ligasaun entre Governu, komunidade no grupu no organizasaun la'ós governamentál, nasionál ka estranjeiru sira, ne'ebé relasiona ho kultura.
Sentru Kulturál Lospalos sei sai mós sentru dinamizadór ba kriasaun no divulgasaun kulturál iha nível rejiaun no fo dalan hodi hala'o eventu kulturál entre rejiaun, distritu no subdistritu oin oin no fo kontribuisaun ba objetivu jeral kona ba harii identidade nasionál iha Timor-Leste no ajuda hodi halo promosaun ba espiritu dame no toleránsia entre ema husi kultura oin oin.
