Governu Timor-Leste

Prezidénsia Konsellu Ministrus

V Governu Konstitusionál

..............................................................................................................................

Díli, Loron 22 Fulan Outubru Tinan 2013

Komunikadu Imprensa

Sorumutu Konsellu Ministru loron 22 fulan Outubru tinan 2013

Governu hala’o sorumutu ida iha tersa-feira ne’e, loron 22 fulan Outubru 2013, iha sala sorumutu Konsellu Ministru nian, iha Palásiu Governu, iha Dili, no aprova ona:

1. Proposta Lei ne’ebé aprova Orsamentu Jerál Estadu Repúblika Demokrátika Timor-Leste nian ba tinan 2014

Proposta Lei Orsamentu Jerál Estadu (OJE) nian ba tinan 2014 halo parte reseita no despeza hotu-hotu Estadu Timor-Leste nian no hosi loron 1 fulan Janeiru 2014 to’o loron 31 fulan Dezembru 2014. Totál ne’ebé kalkula ba reseita hosi fonte hotu-hotu (mina-rai, la’os mina-rai, reseita fiskál, reseita la’os fiskál no mai hosi empréstimu) iha OJE ba períodu ida ne’e nian mak hamutuk dólar amerikanu $2.430,5 (tokon-rihun-rua no rihun-atus-haat-tolunulu no rihun atus lima) dólar amerikanu. Dotasaun orsamentál sira, iha dólar amerikanu nian, mak hanesan tuir mai:

1 – $166,932 (tokon-atus-ida neenulu-resin-neen no rihun-atus-sia-tolunulu-resin-rua), dólar amerikanu ba Saláriu no Vensimentu sira;

2 – $475,636 (tokon-atus-haat hitunulu-resin-lima no rihun-atus-neen-tolunulu-resin-neen), dólar amerikanu ba Bein no Servisu sira;

3 – $292,175 (tokon-atus-rua sianulu-resin-rua no rihun atus-ida-hitunulu-resin-lima), dólar amerikanu ba Transferénsia Públika sira;

4 – $39,713 (tokon-tolunulu-resin-sia no rihun-atus-hitu-sanulu-resin-tolu), dólar amerikanu ba Kapitál Menór;

5 – $525,544 (tokon-atus-lima-ruanulu-resin-lima no rihun-atus-lima-haatnulu-resin-haat), dólar amerikanu ba Kapitál Dezenvolvimentu;

Hasai tiha servisu no fundu autónomu sira, fundu espesiál sira no empréstimu sira, mak totál dotasaun orsamentu nian sira hamutuk dólar $1.020,620 (tokon-rihun-ida-rihun-ruanulu no rihun-atus-neen-ruanulu), dólar amerikanu.

Totál estimativa husi despeza nian sira ba servisu no fundu autónomu sira, iha 2014, mak hamutuk $14,245 (tokon-sanulu-resin-haat no rihun-atus-rua-haatnulu-resin-lima), dólar amerikanu, ne’ebé mak $9,476 (tokon-sia no rihun-atus-haat-hitunulu-resin-neen), dólar amerikanu ne’ebé transfere hosi Orsamentu Estadu nian atu fó subsídiu ba despeza hirak ne’ebé mak boot liu ba ninia reseita rasik.

Totál dotasaun orsamentu nian ba Fundu Infra-Estrutura nian, inklui empréstimu sira mak hamutuk $425,135, tokon-atus-haat-ruanulu-resin-lima no rihun-atu-ida-tolunulu-resin-lima, no $374,087 (tokon-atus-tolu-hitunulu-resin-haat no rihun-ualunulu-resin-hitu), dólar amerikanu hasai tiha empréstimu. Saldu tranzitadu hosi tinan 2013 nian, tuir lei hamutuk $221,013 (tokon-atus-rua-ruanulu-resin-ida no rihun-sanulu-resin-tolu), dólar amerikanu.

Totál dotasaun orsamentu nian ba Fundu Dezenvolvimentu Kapitál Umanu mak $40 (tokon-haanulu), ne’ebé husi valór $3,078 (tokon-rihun-tolu no rihun-hitunulu-resin-ualu), dólar amerikanu koresponde ho saldu tranzitadu hosi tinan 2013 nian, tuir hakerek iha lei.

Totál estimativa ba despeza OJE nian hamutuk $1.500 (tokon-rihun-ida no rihun-atus-lima), dólar amerikanu.

Totál aas liu ne’ebé mak aprova tiha ona ba finansiamentu ho rekrsu ba dívida públika, iha tinan 2014, hamutuk $51,049 (tokon-limanulu-resin-ida no rihun-haanulu-resin-sia), dólar amerikanu.

Reseita hirak ne’ebé la hetan hosi mina-rai mak hamutuk  $161,4 (tokon-atus-ida-neenulu-resin-ida no rihun-haat), dólar amerikanu.

2. Rezolusaun Governu ne’ebé aprova Akordu entre Governu Repúblika Demokrátika Timor-Leste no Governu Japaun atu reabilita Ponte Mola

Aprovasaun ba akordu (“Grant Agreement”) entre Governu Repúblika Demokrátika Timor-Leste no Governu Japaun kona-ba projektu reabilitasaun Ponte Mola (“Project of River Training for the Protection of Mola Bridge”) iha objektivu boot rua: hosi parte ida atu promove reabilitasaun ba infra-estrutura importante ne’e, hosi parte seluk, atu fortalese vínkulu koperasaun ho Parseiru Dezenvolvimentu Timor Leste nian sira.

3. Rezolusaun Governu ne’ebé aprova Akordu entre Governu Repúblika Demokrátika Timor-Leste no Governu Repúblika Indonésia atu Lalika Uza Vistu ba Ema sira ne’ebé Kaer Pasaporte Diplomátiku no Servisu nian

Haree hosi relasaun amizade entre Repúablika Demokrátika Timor-Leste no Repúblika Indonésia, no ho objektivu atu fortalese tan relasaun sira entre país rua ne’e, iha baze resiprosidade nian ida, mak Konsellu Ministru aprova tiha ona akordu ba izensaun ka atu lalika iha vistu ba ema sira ne’ebé kaer pasaporte diplomátiku no servisu nian sira. Nune’e, mak sidadaun nasionál sira Repúblika Demokrátika Timor-Leste nian no sidadaun sira Repúblika Indonésia nian, ne’ebé mak kaer pasaporte diplomátiku ka servisu válidu sira, sei la iha obrigasaun atu hetan vistu tama nian, tránzitu ka hela iha territóriu país ida seluk nian, iha períodu ida ne’ebé labele liuhosi loron tolu -nulu, sura hosi loron nia tama iha territóriu ne’e.

4. Dekretu Governu nian ne’ebé aprova Insentivu Espesiál kona-ba Formasaun Intensiva Dosente sira nian

Ministériu Edukasaun, haree ba kualidade atu hadi’a sistema edukativu nian iha Timor-Leste, nia deskobre katak iha nesesidade atu hala’o ho urjenti, formasaun intensivu ba dosente sira.

Kursu Formasaun Intensivu Dosente sira nian ne’e sei hala’o iha 2013 nia laran, no nia durasaun loron 29 tuir loron servisu nian, ne’ebé, ho ninia natureza partikulár no esepsionál, presiza iha insentivu espesiál ida hanesan prevee ona iha Artigu 51.^o Estatutu Karreira Dosente nian, ba professor sira ne’ebé mak partisipa iha formasaun ne’e.

5. Dekretu-lei ne’ebé aprova atu harii Komisaun Nasionál Kombate hasoru HIV/SIDA iha Timor-Leste (KNKS-TL) no ninia estatutu

Diploma ida ne’e aprova Komisaun Nasionál Kombate hasoru HIV/SIDA no define ninia estrutura, ne’ebé mak komposta hosi Konsellu Nasionál (órgaun plenáriu ne’ebé define polítika sira) no hosi Sekretariadu (órgaun ezekutivu ne’ebé iha kompeténsia atu hala’o administrasaun-téknika no habelar aktividade sira hodi kombate ba HIV/SIDA).

Harii Komisaun Nasionál Kombate hasoru HIV/SIDA mak hanesan parte integrante hosi estratéjia makro-polítika ne’ebé aprova ona iha 2013, ne’ebé define objektivu Governu nian sira ba médiu no longu prazu kona-ba kombate no kontrolu hasoru vírus SIDA ne’ebé bele hada’et iha Timor-Leste. Nune’e, mak iha 2006, Governu aprova tiha Planu Estratéjiku Nasionál HIV/SIDA no nomeia tiha Prezidente Komisaun Nasionál Kombate hasoru HIV/SIDA.

Komisaun ne’e depende direktamente ba Ministériu Saúde no nia hasoru difikuldade oin-oin kona-ba definisaun no implementasaun politika Governu nian sira ba kontrolu moras hirak bele hada’et no buka osan atu kombate hasoru HIV/SIDA, hodi nune’e mak tenki harii duni Komisaun independente ba akonsellamentu polítiku no fó suporte ba implementasaun estratéjia hodi kombate hasoru HIV/SIDA ne’ebé Governu define tiha ona.

6. Saláriu ba Diretór IDN

Governu aprova tiha ona Dekretu ida ne’ebé mak estabelese vensimentu Diretór Institutu Defeza Nasionál nian, nu’udar organizmu integradu iha Ministériu Defeza no Seguransa, maski hetan autonomia administrativa no finanseira.

Konsellu Ministru mos analiza tiha ona:

1. Dezenvolvimentu Sistema Nasionál Pagamentu nian

Banku Sentrál Timor-Leste (BCTL) aprezenta tiha ona ba Konsellu Ministru proposta ida atu dezenvolve Sistema Nasionál Pagamentu (SNP) nian sira ne’ebé sólidu no efisiente. Hodi rekoñese katak ida ne’e mak esensiál ba dezenvolvimentu ekonómiku no inkluzaun finanseira sosiedade nian, maka BCTL loke programa ida atu dezenvolve SNP atu nune’e bele korresponde ho padraun internasionál sira ne’ebé avansadu liu. Programa ida ne’e kompostu hosi elementu prinsipál tolu:  estratéjia dezenvolvimentu SNP nian ida ne’ebé bele abranje hosi tinan tolu to’o lima nia laran; hadi’a ambiente jurídiku no regulamentár ida atu bele rekoñese métodu no sistema pagamentu hirak ne’ebé foun; no introdusaun ba Sistema Transferénsia Automatizadu (STA) ida.

Sistema Transferénsia Automatizadu sei serve ba banku hotu-hotu iha Timor-Leste, nune’e mós ba Tezouru, Diresaun-Jerál Alfándega nian no Diresaun-Jerál Impostu nian.