Sorumutu Konsellu Ministru nian iha loron 16 fulan Jullu tinan 2013
Prezidénsia Konsellu Ministrus
V Governu Konstitusionál
..............................................................................................................................
Díli, Loron 16 Fulan Jullu Tinan 2013
Komunikadu Imprensa
Sorumutu Konsellu Ministru nian iha loron 16 fulan Jullu tinan 2013
Governu hala’o sorumutu iha tersa-feira ne’e, iha loron 16 fulan Jullu tinan 2013, iha sala sorumutu Konsellu Ministru nian, iha Palásiu Governu Díli no aprova ona:
1. Rezolusaun Governu kona-ba Polítika Edukasaun Pré-Eskolár nian
Tuir objetivu ne’ebé trasa ona iha Planu Estratéjiku Dezenvolvimentu nian, Ministériu Edukasaun hetan ona aprovasaun ba Rezolusaun Governu nian kona-ba Polítika Edukasaun Pré-Eskolár ne’ebé mak fó biban ba labarik sira hotu, husi tinan 3 no tinan 5, atu hetan asesu ba programa pré-eskolár ida ne’eb’e ho kualidade, besik iha sira nia uma.
Programa sira edukasaun pré-eskolár nian inklui aspetu hotu-hotu husi dezenvolvimentu infantil nian (sósiu-emosionál, linguístiku, kognitivu (kapasidade atu hetan koñesimentu) no fíziku nian sira) nesesáriu ba labarik sira ne’ebé atu tama ba 1 u siklu bele aprende didi’ak no kle’an liu.
Ministériu Edukasaun fiksa ona área estratéjika haat ne’ebé mak importante liu: hadi’a liután formasaun no dezenvolvimentu profisionál iha servisu profisionál sira edukasaun pré-eskolár nian; atu apoia dezenvolvimentu kurrikulár; dezenvolvimentu hamutuk ho família no komunidade no dezenvolvimentu ba sistema monitorizasaun no avaliasaun nian ida.
Konsellu Ministru mós analiza ona:
1. Projetu Dekretu-Lei ne’ebé estabelese Estrutura Pré-deskonsentrasaun Administrativa
Ministériu Administrasaun Estatál aprezenta, Projetu Dekretu-Lei ida ne’e, ne’ebé analiza ona husi Konsellu Ministrus, atu regula kriasaun, kompeténsia no funsionamentu estrutura sira pré-deskonsentrasaun administrativa nian ne’ebé tenke kria iha distritu administrativu idak-idak ba distritu administrativu sanulu-resin tolu ne’e hotu, iha teritóriu nasionál.
2. Dekretu-Lei ne’ebé aprova Estatutu Militár F-FDTL nian
Sekretaria Estadu Defeza aprezenta ona ba Governu projetu Dekretu-Lei Estatutu Militár F-FDTL sira nian. Diploma ida ne’e ninia objetivu atu estrutura no disiplina karreira militár nian no mai hosi Lei Servisu Militár nian, Lei Orgánika F-FDTL no Lei Orgánika Defeza Nasionál nian sira.
3. Dekretu-Lei kona-ba Unidade Informasaun Finanseira nian
Konsellu Ministru rona aprezentasaun ida kona-ba natureza no finalidade Unidade Informasaun Finanseira nian ida (UIF). UIF mak responsável ba halibur, analiza no fahe informasaun ne’ebé relasiona ho relatóriu tranzasaun bankária ne’ebé diskonfia no informasaun seluk kona-ba krime brankeamentu kapitál no finansiamentu terrorizmu nian sira. Kompete mós ba UIF hodi fó sai rezultadu análize ne’e nian ba autoridade polisiál no judisiál sira.
