Primeiru-Ministru, Kay Rala Xanana Gusmão, ho susesu remata ninia vizita ofisiál ba Reinu Unidu, ne’ebé realiza husi loron 11 to’o loron 14 fulan-abríl tinan 2024, molok arranka ba Atenas, Grésia, iha ne’ebé sei partisipa iha Konferénsia “Ita-nia Oseanu” edisaun ba dala sia (9) husi loron 15 to’o 17 fulan-abríl. Tuirmai, molok fila mai Timor-Leste, Xefe Governu sei marka prezensa iha abertura edisaun Bienal Veneza ba da-60, iha Itália.

Durante ninia vizita iha Reinu Unidu, Primeiru-Ministru hasoru malu ho membru komunidade timoroan ne’ebé emigra iha Reinu Unidu, vizita futura instalasaun Embaixada Timor-Leste nian no partisipa iha lansamentu podcast “The Citizen’s Connection”, inisiativa ida husi embaixada Timor-Leste nian ne’ebé ho objetivu atu promove hodi fahe informasaun entre sidadaun timoroan sira iha territóriu ne’ebá. Xanana Gusmão realiza mós sorumutuk ida ho eis-Enviadu Espesiál Sekretáriu-Jerál Nasoins Unidas nian iha Timor-Leste, iha tinan 1999, Ian Martin.

Husi loron 15 to’o loron 17 fulan-abríl tinan 2024, Primeiru-Ministru sei bá Gresia, hodi partisipa iha Konferénsia “Ita-nia Oseanu” edisaun ba dala-9, ne’ebé hala’o iha Atenas, ho nia tema “Oseanu ida ne’ebé Potensiál”. “Objetivu ba konferénsia ida-ne’e atu aborda área estratéjika neen, inklui promove área mariña protejida, promove ekonomia azúl ida ne’ebé sustentavel, kombate ba krize klimátika, fó apoiu ba seguransa marítima, promove peska sustentavel no luta kontra poluisaun mariña.

Partisipasaun Xanana Gusmão iha eventu internasionál ida-ne’e la’ós de’it atu reforsa kompromisu Timor-Leste nian ho prezervasaun no sustentabilidade oseanu, maibé mós oferese plataforma ida ba país hodi kontribui ho ativa ba solusaun globál sira ne’ebé relasiona ho dezafiu mariñu.

Presiza hatene katak, iha loron 16 fulan-abríl, Primeiru-Ministru sei halo intervensaun ida iha segmentu Altu Nivel nian, iha ne’ebé nia sei hala’o sorumutuk ho Xefe Estadu no Governu sira seluk, iha diálogu importante ida kona-ba kestaun marítima no asaun sira ne’ebé presiza hodi hasoru dezafiu atuál sira ne’e no ba futuru.

Molok fila mai Timor-Leste, Xanana Gusmão sei liubá Itália, iha ne’ebé sei marka prezensa iha abertura edisaun Bienal Veneza ba da-60. Eventu ho prestíjiu internasionál ida ne’ebé sai relevánsia/importante liután ba Timor-Leste, iha tinan ida-ne’e tanba ba dala uluk sei konta ho partisipasaun artista timoroan ida, Maria Madeira. Bienal Veneza, ne’ebé sei hala’o to’o loron 24 fulan-novembru tinan 2024.