Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 20 fulan-marsu tinan 2024

Konsellu Ministrus hala’o sorumutuk iha Palásiu Governu, Dili, no aprova ona projetu Dekretu Governu, ne’ebé aprezenta husi Ministru Tomás do Rosário Cabral, ne’ebé estebelese data ba realizasaun Asembleia Aldeia no Konsellu Suku iha ámbitu prosedimentu eleisaun lider komunitáriu sira.

Tuir kalendáriu ne’ebé aprova ona, prosesu konstituisaun meza eleitorál suku no kandidaturas ba eleisaun Xefe Suku no ninia kontensiozu, sei hala’o iha loron 12 fulan-abríl tinan 2024. Períodu informasaun públika no edukasaun eleitór kona-ba prosesu eleisaun lideransa komunitária nian sei hala’o to’o loron 24 fulan-abríl tinan 2024.

Eleisaun Xefe Suku ne’e sei hala’o iha loron 27 fulan-abríl no apuramentu ba rezultadu tenke termina iha loron 28 fulan-abríl tinan 2024. Uainhira laiha kandidatu xefe suku ne’ebé maka hetan votu válidu liu metade ne’ebé fó-sai, sei realiza filafali votasaun daruak entre kandidatu rua ne’ebé hetan votu maioria iha loron 13 fulan-maiu tinan 2024.

Votasaun ba eleisaun Lia na’in no Reprezentantes Juventude ba Konsellu Suku sei hala’o to’o loron 8 fulan-maiu ka to’o loron 24 fulan-maiu tinan 2024.

Iha loron 28 fulan-Outubru 2023, halo ona eleisaun sira ne'ebé koresponde ba maioria husi Sukus hotu, maibé eleisaun iha Suku sanulu ne'ebé mandatu sira iha tiha ona to'o tinan ida-ne'e, nune'e dadaun ne'e presiza atu ajenda realizasaun ba eleisaun iha Sukus maka hanesan Lequitura (Aileu), Bocolelo (Aileu), Ailoc (Dili), Bebonuc (Dili), Madohi (Dili), Manleu-Ana (Dili), Mantelolão (Dili), Sicone-Dilole (Manatuto), Laicore (Manatuto) no Builo (Viqueque), no mós inklui eleisaun ba Xefe Aldeia Rebutic Eon, iha munisípiu Manatuto.

*****

Konsellu Ministrus aprova ona apoiu hodi rekolla lixu iha Dili.

Governu rekoñese nesesidade urjente atu kombate lixu, inklui lixu tasi, liuhusi asaun oioin hanesan sensibilizasaun, limpeza iha tasi no tasi ninin, no inisiativa seluk hodi halo monitorizasaun, kontrolu, redusaun no mitigasaun lixu.

Objetivu husi delibersaun ne'e ida-ne’e maka atu promove koordenasaun entre ministériu oioin no entidade públika sira hodi alkansa objetivu ba apoiu ida-ne’e, liuliu ba sira ne’ebé responsavel ba meiu ambiente no administrasaun estatál, nune’e mós determina hodi halo prosedimentu nesesáriu ba aprovasaun no finansiamentu operasaun sira ne’e, to’o montante másimu dolar amerikanu millaun 1,88.

*****

Konsellu Ministrus aprova ona projetu Proposta Lei ba alterasaun datoluk Lei n. 3/2006, loron 12 fulan-abríl, kona-ba Estatutu Kombatentes Libertasaun Nasionál, ne’ebé aprezenta husi Ministru Asuntus Kombatentes Libertasaun Nasionál, Gil da Costa Monteiro “Oan Soru”.

Objetivu husi Proposta Lei ida-ne’e maka atu promove rekoñesimentu ofisiál ba Veteranus no Kombatentes Libertasaun Nasionál, liuhusi atribui kondekorasaun no aktu rekoñesimentu sira seluk ba ema-sira ne’ebé luta ba país ne’e durante períodu perturbadu luta ba independénsia no soberania nasionál, liuliu husi tinan 1975 to’o 1978, ne’ebé korresponde ba períodu Baze Apoiu nian.

Proposta ne'e mós ho objetivu atu korrije lakunas iha lejizlasaun atuál kona-ba atribuisaun pensaun ba família Martires Libertasaun Pátria, no mós rezolve problema sira iha implementasaun pensaun pekuniária únika no altera estrutura reprezentativa Kombatentes Libertasaun Nasionál nian hodi kontribui ba armonia sosiál no estabilidade polítika nasionál.

*****

Projetu Proposta Lei kona-ba Kódigu Propriedade Industriál, ne'ebé aprezenta husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, no Vise-Ministru Komérsiu Augusto Júnior Trindade, mós hetan ona aprovasaun.

Maske Lei n. 14/2022 aprova ona Kódigu Direitu Autór no Direitus Koneksus, maibé lejizlasaun kona-ba propriedade industrial seidauk regulamenta iha país ne’e. Lakuna ida-ne’e aborda husi artigu da-1223 husi Kódigu Sivíl, ne'ebé rekoñese nesesidade lejizlasaun espesiál kona-ba direitus propriedade industriál.

Propriedade industriál abranje protesaun invensoins, dezeñus industriais, markas, no sira seluk, no hala’o papél krusiál ida iha dezenvolvimentu nasionál, liuhusi insentiva inovasaun no kriatividade. Regulasaun ba setór ida-ne'e maka fundamentál atu promove ekonomia no atinje Objetivu Dezenvolvimentu Sustentável. Importante atu hatete katak propriedade industriál la limita de'it ba indústria tradisionál, maibé mós ba indústria agrikultura, extrativas no produtu manufaturadu ka naturál sira hotu, hanesan indika ona iha Konvensaun Paris kona-ba Propriedade Industrial.

Protesaun ba direitu sira-ne'e’ promove ambiente emprezariál ida ne’ebé favoravel ba inovasaun, aleinde garante kompetitividade iha merkadu globál. Partisipasaun Timor-Leste iha ekonomia mundiál presiza adosaun norma internasionál ba propriedade industriál, hanesan ezije ona husi adezaun ba Organizasaun Mundiál Komérsiu. Projetu lei ida-ne'e ho objetivu atu armoniza prátika nasionál ho padraun internasionál, no fornese kódigu ida ne’ebé modernu no efikás.

Kódigu Propriedade Industriál iha artigu 282, ne’ebé inspira husi direitu komparadu no kompromisu internasionál sira ne'ebé Timor-Leste asume ona, no hanoin kona-ba kestaun hotu ne'ebé relasiona ho propriedade industriál, ne’ebé fasilita kompriensaun no uza hosi ema hotu iha sira nia atividade sientífiku, kriativu no ekonómiku, presiza atu uza kódigu ne'e.

*****

Konsellu Ministrus aprova projetu Dekretu-Lei kona-ba alterasaun dahuluk ba Dekretu-Lei n. 33/2020, loron 2 fulan-setembru, kona-ba Estatutu Militár FALINTIL-Forsa Defeza Timor-Leste (F-FDTL), ne’ebé aprezenta husi Ministru Defeza, Donaciano do Rosário Gomes.

Hanesan estabelese ona iha Programa Governu Konstitusionál IX, atu atinje objetivu sira ne'ebé trasa ona, importante tebetebes maka kontinua atu dezenvolve medidas no implementa asaun sira ne'ebé lori ba prosesu reforma ne'ebé justu no dignu ba militár veteranu sira ne'ebé sei ativu iha servisu. Ho hanoin ida-ne'e, Governu hakarak elimina restrisaun ne'ebé antes ne’e impoin ba militár sira ne'ebé atinje idade reforma, iha tinan 60, hodi labele ezerse tan funsaun militár.

Tanba ne'e, intervensaun lejizlativu ida-ne'e nia objetivu atu asegura katak militár veteranu sira, hafoin reforma, bele, karik sira hakarak, kontinua halo funsaun militár la operasionál ba períodu ne'ebé determinadu. Funsaun sira-ne'e inklui kargu administrativu, apoiu sosiál militár, atividades kona-ba ensinu no formasaun, peskiza, dezenvolvimentu no inovasaun, aleinde área sira seluk ne'ebé prezerva istória militár Timor-Leste nian. Medida ida-ne'e nia objetivu atu asegura katak legadu husi militár veteranu sira, transmite valores hanesan patriotizmu, korajen no sakrifísiu ba jerasaun aban-bain rua nian.

Projetu Dekretu-Lei ne’e promove mós alterasaun ba durasaun kargu Xefe Estadu-Maiór Jenerál Forsas Armadas (CEMGFA, sigla iha lian portugés) no Vise-CEMGFA, ne’ebé limita mandatu durante tinan tolu, ho posibilidade halo renovasaun ba tinan rua tan, tuir proposta ne’ebé aprova husi Konsellu Superiór Defeza Militár nian.

Ho alterasaun ida-ne’e, ne’ebé hala’o besik tinan haat hafoin implementasaun Estatutu Militár F-FDTL nian ne’ebé hakarak atu valoriza kontribuisaun militár veteranu sira ne’ebé reforma no estabelese prazu foun ba kargu lideransa militár nian.

*****

Ikusliu, Konsellu Ministrus analiza ona aprezentasaun, husi Prezidénsia Konsellu Ministrus, kona-ba remunerasaun ba titulár sira órgaun pesoa koletiva públika ne’ebé integra iha Administrasaun indireta Estadu. REMATA