Primeiru-Ministru Timor-Leste, Kay Rala Xanana Gusmão, hala’o sorumutuk ho Primeiru-Ministru Austrália, Anthony Albanese, iha loron 5 fulan-marsu tinan 2024, aleinde partisipa iha Simeira komemorativa ba da-50 aniversáriu parseria diálogu Austrália ho ASEAN nian, ne’ebé hala’o iha Sentru Konvensoins no Espozisoins Melbourne. 

Iha sorumutuk ida-ne’e, lider na’in-rua diskute atu fortalese no haluan kooperasaun bilaterál ba tempu naruk, ho objetivu atu promove setór esensiál sira ne’ebé fó benefísiu ba populasaun hosi país viziñu rua ne’e.

Primeiru-Ministru, Kay Rala Xanana Gusmão, kongratula Anthony Albanese ba tinan 50 relasoins parseria no diálogu entre Austrália no Asosiasaun Nasoins Sudeste Aziátiku (ASEAN). Xefe Governu agradese mós ba konvite hodi partisipa iha simeira ida-ne’e, hanesan país observadór ASEAN nian. 

Anthony Albanese fó boazvindas ba Xanana Gusmão no reafirma Austrália nia apoiu ba Timor-Leste nia adezaun plena ba ASEAN.

Iha sorumutuk ne’e, ko’alia kona-ba kestaun oioin ne’ebé relasiona ho relasoins diplomátikas no kooperasaun bilaterál ne’ebé eziste tempu naruk entre parte rua, destaka mós kompromisu hamutuk atu fortalese no haluan kolaborasaun ida-ne’e. 

Aleinde Xefe Governu na’in-rua, Vise-Primeiru-Ministru no Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Negósios Estranjeirus no Kooperasaun, Bendito dos Santos Freitas,  Vise-Ministra ba Asuntus ASEAN, Milena Rangel,  Embaixadora Timor-Leste iha Austrália, Inês de Almeida, Xefe Gabinete Primeiru-Ministru, Elizabeth Exposto, no ekipa téknika mós marka prezensa.  Primeiru-Ministru Austrália akompaña husi Ministra Negósius Estranjeirus, Penny Wong, no membru Governu australianu nian sira-seluk .