Ministru Asuntus Kombatentes Libertasaun Nasionál, Gil da Costa Monteiro “Oan Soru”, iha loron 27 fulan-fevereiru tinan 2024 lansa ona Portál Konsulta ba Kombatentes. Iha tempu hanesan halo mós abertura inskrisaun bolsa estudu ba kombatente no martir sira nia oan ba tinan letivu 2024. Serimónia ne’e hala’o iha Salaun Aisirimou, iha sede Konsellu Kombatentes Libertasaun Nasionál (CCLN, Sigla iha lian portugés), ne’ebé marka prezensa husi Sekretáriu Estadu Veteranus, Cesar dos Santos da Silva “Merak”, Diretór Nasionál Pensoins no Sobrevivénsia, Manuel dos Santos Araújo, no segundu Vise-Prezidente CCLN nian, Nicolau dos Reis. Portál Konsulta ba Kombatentes ne’e bele hetan asesu iha https://macln.net/. 
Portál ida-ne’e ho objetivu atu simplifika asesu ba servisu Ministériu Asuntus Kombatentes Libertasaun Nasionál nian, hodi permite veteranus no sira-nia família konsulta sira-nia dadus ho fasil no efisiente, la presiza mai to’o Dili. Aleinde informasaun kona-ba Kombatentes Libertasaun Nasionál, Portál ne’e mós inklui dadus kona-ba lejizlasaun, formuláriu no avizu.
Iha loron 26 no 27 fulan-fevereiru, fó ona formasaun ba membrus Konsellu Kombatentes Libertasaun Nasionál husi munisípiu hotu-hotu, inklui RAEOA, kona-ba oinsá utiliza Portál ne’e no konsulta sira-nia dadus. 
Durante serimónia ne’e, Ministru Gil da Costa Monteiro “Oan Soru”, ko’alia-liu kona-ba importánsia husi portál ida-ne’e hanesan ferramenta fundamentál hodi fornese apoiu ida ne’ebé efikás ba veteranus.
Kandidaturas ba bolsa estudu ne’e bele aprezenta to’o loron 3 fulan-abril oinmai. Programa ida-ne’e iha orsamentu totál ho dolar amerikanu millaun 1,1 no abranje nivel ensinu oin-oin, husikedas ensinu báziku to’o ba ensinu superiór, tantu iha Timor-Leste no mós iha estranjeiru. Kritérius elejibilidade nian inklui oan sira husi kombatentes ne’ebé mate durante luta ba libertasaun nasionál no kombatentes ne’ebé benefisia hosi pensaun espesiál ba subsisténsia ka reforma. Ba tinan 2024, iha vaga hamutuk 100 ba kada munisípiu, ne’ebé ho totál vaga 1300 ba nivel ensinu hotu-hotu. Informasaun liután kona-ba prosesu ida-ne’e disponivel iha Portál Konsulta ba Kombatentes.