Timor-Leste selebra Loron Nasionál Feto nian ba da-46
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Dili, loron 31 fulan-outubru tinan 2022
Timor-Leste selebra Loron Nasionál Feto ba dala 46
Governu Konstitusionál VIII hato’o parabéns ba feto timoroan tomak iha selebrasaun Loron Nasionál Feto nian ba da-46, ne’ebé marka ho loron mate eroina nasionál ida nian, Maria Tapó, ne’ebé fó nia vida ba luta autodeterminasaun nasionál no iha ne’ebé selebra papél importante feto timoroan nian iha luta ba independénsia nasionál.
Tinan ida-ne’e, selebrasaun ne’e ho tema “Feto prontu ona atu lidera” inklui ho misa ida no tau ai-funan ba eroina nasionál sira iha Jardim dos Herois da Pátria iha Metinaru no iha Portu Dili. Komemorasaun sira ne’e kontinua hafoin ho sertame ida ne’ebé hala’o iha Centro de Convenções de Díli.
Sekretária Estadu ba Igualdade no Inkluzaun, Maria do Rosário Fátima Correia, iha mensajen ida ne’ebé fó-sai ohin, hato’o importánsia husi loron ida-ne’e nian “hodi valoriza, onra no rekoñese feto timoroan sira ne’ebé sakrifika ona sira nia an iha luta ba autodeterminasaun nasionál” no afirma mós katak “iha tempu dezenvolvimentu nasionál, feto sira nafatin iha knaar ida ne’ebé importante, hamutuk ho mane sira, ho serbisu ne’ebé boot no envolve iha área no setór oioin, hodi kontribui ba moris-di’ak povu timoroan nian”.
Portavós Governu Konstitusionál VIII nian, Ministru Fidelis Magalhães, afirma katak “iha loron ida-ne’e, ita selebra papél importante tebes ne’ebé feto timoroan hala’o iha luta ba independénsia Timor-Leste nian, ita haree mós kontribuisaun feto iha prosesu dezenvolvimentu país nian”.
Ministru Fidelis hateten katak “Governu VIII sente orgullu ho medida sira ne’ebé foti atu promove direitu feto sira nian no reforsa sira-nia kapasidade no podér sosioekonómiku, hanesan aprovasaun Deklarasaun Maubisse, Planu Asaun Nasionál kontra Violénsia Bazeia ba Jéneru no hadi’a nivel seguransa ba feto sira, kondisaun eskolár sira, no bee no saneamentu.
Portavós Governu nian ne’e mós afirma filafali katak “Governu kontinua komprometidu hodi alkansa oportunidade sira ne’ebé hanesan ba ema hotu-hotu, la hare ba jéneru, ho nune’e konstrui mundu ne’ebé di’ak liu, iha ne’ebé mane no feto moris iha armonia nia laran, livre husi violénsia no diskriminasaun”. REMATA
