Prezidente no membru sira husi Konsellu Diretivu Imprensa Nasionál nian simu pose
Ministru Prezidénsia Konsellu Ministrus, Fidelis Manuel Leite Magalhães, iha loron 14 fulan-janeiru tinan 2021, fó ona pose ba membru sira husi Konsellu Diretivu Imprensa Nasionál Timor-Leste, I. P. (INTL). Serimónia ne’e hala’o iha Palásiu Governu, iha Dili.
Jaime Fernando dos Mártires Carvalho Correia, ne’ebé to’o ohin loron okupa ona kargu hanesan Diretór iha instituisaun ida-ne’e, simu ona pose nu’udar Prezidente Konsellu Diretivu INTL nian, Beatriz Ximenes Martins simu pose nu’udar Viseprezidente no Vogál Konsellu Diretivu nian, Elídio da Cruz de Carvalho sei okupa kargu nu’udar Vogál Konsellu Diretivu nian no Natalino Auxiliadora de Deus simu pose nu’udar Fiskál Úniku INTL nian.
Ministru hato’o ninia felisitasaun ba sira ne’ebé foin simu posse, fó votu kontinuasaun serbisu di’ak no hatudu ninia haksolok tanba bele atinje pasu importante ida-ne’e atu kumpre mehi no ambisaun hodi transforma Imprensa Nasionál ba Institutu Públiku ho profisionalizmu ne’ebé aas.
Jaime Correia, daudaun ne’e nu’udar Prezidente INTL, agradese ba konfiansa ne’ebé Governu fó ba nia iha nomeasaun ida-ne’e no promete, maske dezafiu boot ne’ebé mak iha, atu hala’o misaun boot ida-ne’e ho profisionalizmu aas tebes.
Harii iha tinan 1960, ho naran “Imprensa Nasionál”, instituisaun ida ne’e, iha tempu ne’ebá, iha misaun hodi halo publikasaun ba atu ofisiál sira governu koloniál nian no halo produsaun ba formuláriu ofisiál sira. Durante okupasaun indonézia, nafatin hala’o atividade hanesan, ho naran “Badan Percetakan Nasional”. Ho restaurasaun independénsia Repúblika Demokrátika Timor-Leste nian, hanaran fali “Gráfika Nasionál”. Iha tinan 2013, hahú prosesu transformasaun ida, ho aprovasaun ba ninia Planu Estratéjiku Reestruturasaun no Modernizasaun, ho objetivu atu transforma nia neineik-neineik ba empreza moderna ida no autosustentavel. Prosesu ida-ne’e lori ona nia atu tama iha merkadu nasionál, iha tinan 2016, bainhira hahú halo servisu sira produsaun gráfika nian no mós ba entidade privada sira. Iha tinan 2017, muda ba Institutu Públiku no muda ninia naran ba ida-ne’ebé ohin loron koñesidu, “Imprensa Nasionál Timor-Leste”.
