Governu Timor-Leste

Prezidénsia Konsellu Ministrus

VII Governu Konstitusionál

..............................................................................................................................

Komunikadu Imprensa

Sorumutuk Konsellu Ministrus nian loron 8 fulan-novembru tinan 2017

Governu hala’o sorumutuk iha Palásiu Governu, iha Dili, no aprova alterasaun dahuluk ba Lei n^u.13/2016, loron 29 fulan-dezembru, ne’ebé aprova Orsamentu Jerál Estadu ba tinan 2017. Konta sira husi Ministériu Planu Finansas, kona-ba elaborasaun orsamentu ida ne’e, gia husi fatór oioin. Atu nune’e, polítika foun no nesesidade hodi bele hatán ba estrutura orgánika Governu Konstitusionál VII. Iha tempu hanesan, iha urjénsia atu kumpri ba kompromisu ne’ebé asume ona ho intensaun atu hadi’a formulasaun no ezekusaun polítika públika sira nian no atu haforsa planu dezenvolvimentu iha prazu naruk. Objetivu husi kontensaun ba despeza Ezekutivu sira nian, hanesan mós parte fundamentál ekuasaun nian. Nune’e, totál estimativa husi reseita ne’e hamutuk dolar 1.874,400 (mil millaun ida, atus-ualu hitu-nulu resin haat no dólar rihun atus haat). Proposta ne’e sei aprezenta ba Parlamentu Nasionál, iha dadeer, loron 9 fulan-novembru.

Lei orgánika Governu Konstitusionál VII nian mós hetan ona aprovasaun. Dokumentu ne’e, aprezenta husi Primeiru-Ministru, Mari Alkatiri, no husi Unidade Apoiu Jurídiku Prezidénsia Konsellu Ministrus, ne’ebé define estrutura Ezekutivu no distribuisaun kompeténsia husi Ministériu no Sekretária Estadu oioin. Mudansa sira kona-ba estrutura governativa anteriór, hakarak atu fó liután efisiénsia ba rekursu públiku sira no fó valór ba rekursu umanu sira iha prosesu modernizasaun ne’ebé Governu Konstitusionál VII hakarak implementa iha instituisaun sira. La iha ona ministru koordenadór sira, sira-nia atribuisaun kona-ba koordenasaun nian fó fali ba Primeiru-Ministru, hetan apoiu husi ministru foun sira ne’ebé tama iha estrutura Prezidénsia Konsellu Ministrus nian, ne’ebé maka hetan atribuisaun espesífika iha área sira hanesan Seguransa Nasionál, Delimitasaun Ketan sira (Fronteiras) no Governasaun. Nune’e mós la iha ona Ministériu Planeamentu no Investimentu Estratéjiku, ne’ebé  kuaze ninia atribuisaun tomak asegura husi Ministériu Dezenvolvimentu no Reforma Institusionál foun. Ministériu Planu no Finansas maka sai nu’udar responsavel úniku ba planu orsamentál. Área balun, hetan autonomia, hanesan kazu Sekretaria Estadu Veteranus foun, ne’ebé hetan responsabilidade direta husi Primeiru-Ministru, ida ne’e hatudu  Governu ninia atensaun boot ba Kombatente sira Libertasaun Nasionál nian. Nune’e, Foin-sa’e sira oras ne’e hamutuk ho Tarballu, ne’ebé maka hetan mós responsabilidade direta husi Primeiru-Ministru. Harii ona Sekretaria Estadu Desportu no Promosaun ba Alta Kompetisaun. Estrutura orgánika foun ida ne’e importante tebes hodi konkretiza ajenda transformasaun nian ne’ebé harii husi Planu Estratéjiku Dezenvovimentu tinan 2011-2030 no husi objetivu sira Dezenvolvimentu Sustentavel, hodi garante katak Estadu no Administrasaun Públika sai efisiente, efikás no orienta ba rezultadu sira ne’ebé iha kualidade.

Governu mós aprova ona, atribuisaun ba reabiltasaun no manutensaun estrada iha munisípiu sira iha li’ur sidade Dili ba manán-na’in husi konkursu ne’ebé hetan finansiamentu husi Fundu Europeu Uniaun Europeia nian no jere husi Banku Dezenvolvimentu Aziátiku.

Konsellu Ministrus analiza ona alterasaun sira ba Programa Governu Konstitusionál VII, atu deside kona-ba kestaun espesifíka sira no kestaun hirak ne’ebé laós relevante, ne’ebé identifika husi ekipa Unidade Planeamentu, Monitorizasaun no Avaliasaun ne’ebé mak halo hela dokumentu liuhusi orientasaun Ministru Prezidénsia Konsellu Ministru, Adriano do Nascimento no Ministru Planu no Finansas, Rui Gomes. Programa ne’e orienta husi Planu Estratéjiku Dezenvolvimentu no husi Objetivu Dezenvolvimentu Sustentavel, hodi apoia polítika diversifikasaun ekonómika atu proporsiona independénsia finanseira ba reseita petrolífera sira. Vizaun inkluziva, defeza justisa no promosaun nian ba moris-di’ak, hakerek iha dokumentu ida ne’ebé rigór no detalladu, sei tulun Governu atu hatán ba preokupasaun ne’ebé maka foti husi deputadu sira durante apresiasaun dahuluk, iha fulan kotuk, iha Parlamentu Nasionál. Programa sei aprezenta fila fali, ba Parlamentu Nasionál, iha tinan ida ne’e.

Ministru Administrasaun Estatál, Valentim Ximenes, halo pontu situasaun ida kona-ba organizasaun ba selebrasaun aniversáriu Proklamasaun Independénsia da-42, ne’ebé halo tiha ona iha loron 28 fulan-novembru tinan 1975, husi Francisco Xavier do Amaral.

Primeiru Ministru informa ba membru sira Governu nian katak aterrajen ba inagurasaun pista foun iha Aeroportu Internasionál Oekusi Ambenu sei hala’o iha loron 24 fulan ida ne’e. REMATA