Sorumutuk Konsellu Ministrus nian loron 25 fulan-outubru tinan 2017
Prezidénsia Konsellu Ministrus
VII Governu Konstitusionál
..............................................................................................................................
Komunikadu Imprensa
Sorumutuk Konsellu Ministrus nian loron 25 fulan-outubru tinan 2017
Governu hala’o sorumutuk iha loron 25 fulan-outubru, iha Palásiu Governu, iha Dili, atu analiza alterasaun sira ba Programa Governu Konstitusionál VII nian, tanba haree ba preokupasaun sira ne’ebé maka deputadu sira hato’o durante apresiasaun ba dokumentu ne’e iha Parlamentu Nasionál, ne’ebé hala’o husi loron 16 to’o 19 fulan-outubru. Reestruturasaun ba dokumentu ne’e koordenada husi Ministru Presidénsia Konsellu Ministrus, Adriano do Nascimento, no Ministru Planu no Finansas, Rui Gomes.
Iha Sorumutuk ne’e analiza mós Orsamentu Estadu Retifikativu, ne’ebé aprezenta husi Ministru Planu no Finansas. Orsamentu Retifikativu ba tinan 2017 nian haree mós ba estrutura foun Governu nian, kompromisu sira ne’ebé asume ona no preokupasaun Ezekutivu nian atu evita gasta osan la tuir nia dalan.
Programa no Orsamentu Retifikativu sei aprezenta hamutuk ba Parlamentu Nasionál, to’o tinan nia rohan. REMATA
