Sorumutuk Konsellu Ministrus nian iha loron 18 fulan-outubru tinan 2016
Prezidénsia Konsellu Ministrus
VI Governu Konstitusionál
..............................................................................................................................
Dili, loron 18 fulan-outubru tinan 2016
Komunikadu Imprensa
Sorumutuk Konsellu Ministrus loron 18 fulan-outubru tinan 2016
Konsellu-Ministrus hala’o sorumutuk iha tersa-feira ne’e, iha Palásiu Governu, iha Dili, no aprova ona proposta sira ne’ebé aprezenta husi Komisaun Nasionál Aprovizionamentu nian, iha koordenasaun ho Ministru Obras Públikas, Transportes no Komunikasoins, ba ezekusaun hadi’a projetu sira no manutensaun ba estrada ne’ebé maka liga Maubara ho Karimbala, Atabae ho Mota-Ain no Baukau ho Lautein, ruzultadu sira husi konkursu internasionál nian.
Ministériu Administrasaun Estatál hetan ona aprovasaun ba proposta asinatura Memorandu Entendimentu ho Ministériu Interiór Repúblika Koreia nian kona-ba aplikasaun projetu-pilotu dezenvolvimentu rurál no halakon moris-kiak nian iha Timor-Leste, tuir filozofia husi Saemaul Undong (Movimentu Aldeia Foun).
Aprova ona mós proposta alterasaun ba Dekretu-Lei n. 33/2014, loron 3 fulan-dezembru, ne’ebé harii Institutu Peskiza, Dezenvolvimentu, Formasaun no Promosaun Au nian, aprezenta husi Ministru Estadu no Koordenadór Asuntu Ekonómiku nian. Alterasaun ne’e ho nia objetivu atu simplifika funsionamentu Institutu Au nian, ne’ebé maka sei sai hanesan órgaun diresaun unipesoál nian ida, Diretór Ezekutivu; iha prátika, diresaun ne’e funsiona ona ho di’ak. Sei taka tiha Konsellu Diretivu no Konsellu Sientífiku no Pedagójiku. Hakarak mós atu finaliza tiha regulamentu orgániku sira no funsionamentu Institutu nian, no sira seluk.
Konsellu Ministrus analiza ona projetu ba proposta Lei ba Protesaun Labarik nian, ne’ebé aprezenta husi Ministériu Solidariedade Sosiál, atu promove direitu sira, kona-ba prevensaun no protesaun labarik ne’ebé iha risku no perigu, nune’e bele garante nia moris-di’ak no dezenvolvimentu integral (kompletu). Projetu ne’e kumpre objetivu ne’ebé trasa tiha ona husi Governu dezenvolvimentu estratéjia sira ne’ebé garante protesaun labarik nian kontra violénsia, neglijénsia no abuzu. Nune’e prienxe fatin mamuk ida iha ordenamentu jurídiku, ba protesaun labarik ne’ebé iha risku no iha perigu.
Ministru Komérsiu, Indústria no Ambiente aprezenta ona projetu kona-ba Rezolusaun no esbosu Kontribuisaun Pretendida, Determinada iha Nivel Nasionál (iha lia-inglés:”Intended Nationally Determined Contributions-INDC”), iha tempu badak sei aprezenta ba Organizasaun Nasoins Unidas nian. REMATA
