Governu fó parabéns ba António Guterres
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 8 fulan-outubru tinan 2016
Governu fó parabéns ba António Guterres
Timor-Leste fó parabéns ba António Guterres no Portugál tanba anúnsiu ne’ebé fó sai katak Konsellu Seguransa Nasoins Unidas nomeia ona nia ho lian ida de’it (unánime) atu sai nu’udar Sekretáriu-Jerál Nasoins Unidas nian tuirmai.
António Guterres sai ona Primeiru-Ministru Portugál nian, husi tinan 1995 to’o 2002, no hala’o ona serbisu hanesan Komisáriu Aas Nasoins Unidas nian ba Refujiadu sira, husi tinan 2005 to’o 2015. Povu Timor-Leste iha admirasaun boot ida ba nia, tanba nia mós sai hanesan defensór ba ita-nia luta ba ukun-an no sempre hatudu interese no orgullu ba ita-nia nasaun nia progresu sira, liuliu iha matéria demokrasia, pás, estabilidade no dezenvolvimentu sosiál. Nia mai Timor-Leste ba dahuluk iha tinan 2000 no, mai fali iha tinan 2002, ba serimónia Restaurasaun Indenpendénsia nian.
Konsellu Seguransa Nasoins Unidas nian rekomenda atu Estadu-membru 193 nomeia nia ba mandatu ida tinan lima nian, hahú husi loron 1 fulan-janeiru tinan 2017. Asembleia Jerál tenke hala’o sorumutuk iha semana oin, hodi konfirma ninia nomeasaun.
António Guterres hahii fila-fila ba kauza povu timoroan nian, hodi sai hanesan “buat ida ne’ebé importante mós iha hau-nia vida polítika”, no husu atu ema hotu-hotu bele “serbisu hamutuk atu tulun nasaun ki’ik ida ne’e bele iha kbiit hodi hasoru ninia futuru ho laran metin no susesu”.
Antigu Primeiru-Ministru portugés ne’e sei troka Ban Ki-Moon hodi lidera Organizasaun Nasoins Unidas, ne’ebé kumpre ona mandatu rua nu’udar Sekretáriu-Jerál. Primeiru-Ministru Timor-Leste, Rui Maria de Araújo, foin lalais ne’e hato’o ona, iha Asembeleia Jerál organizasaun ida ne’e nian “ami nia agradesimentu ne’ebé kle’an ba Sekretáriu-Jerál Ban Ki-Moon ba apoiu tomak ne’ebé Timor-Leste simu ona durante tinan 10 nia kaer kargu ne’e”.
Portavós Governu Konstitusionál VI, Ministru Estadu Agio Pereira, hateten katak “povu Timor-Leste iha kariñu boot ba Sr. António Guterres no ho laran tomak ami fó parabéns ba nia, no ba Portugál, tanba nomeasaun ne’ebé nia simu ona. António Guterres nu’udar ema ida ne’ebé ho kualidade espesiál ida atu sai nu’udar Sekretáriu-Jerál no sei hasoru époka ida nakonu ho ezijénsia, iha ne’ebé organizasaun ne’e hasoru hela dezafiu globál hirak ne’ebé uluk seidauk akontese. Timor-Leste haksolok ho ninia nomeasaun, tanba konsidera katak ema ne’ebé atu hala’o knaar importante iha lideransa internasionál nian iha nivel luan liu tenke asume husi ema ida ne’ebé iha intelijénsia, esperiénsia no integridade, hanesan Enjeñeiru Guterres”. REMATA
