Kampaña hamoos fo’er iha tasi-Ibun
Ministru Estadu, Koordenadór ba Asuntu Ekonómiku no Ministru Agrikultura no Peska, Estanislau da Silva ho Vise-Ministru Agrikultura no Peskas, Marcos da Cruz, hamosu inisitiva hodi konvida grupu Movimentu Tasi Moos, membru polísia sira husi Departamentu Imigrasaun, funsionáriu sira husi MAP, inklui funsionáriu sira husi Empreza Dellos halo limpeza jerál iha área tasi-ibun Bidau Lecidere, Dili, iha domingu, loron 17 fulan-abríl tinan 2016.
Atividade limpeza ida ne’e organiza husi grupu Movimentu Tasi Moos no mós funsionáriu sira hosi Ministériu Agrikultura no Peska husi Diresaun Jerál Ambiente.
Estanislau da Silva informa katak inisiativa kampaña hamoos fo’er iha tasi-ibun ida ne’e mai husi husi Ministériu Agrikultura no Peska ho hanoin atu halo sidade Dili sai sidade ne’ebé moos no di’ak hodi atrai turista sira ne’ebé hakarak vizita Timor-Leste.
“Atividade ne’e la’os atu halo ohin de’it, maibé iha kontinuasaun. Ita hakarak halo promosaun katak ita-nia tasi di’ak no moos ba ema ne’ebé vizita ita-nia rain. Nune’e, husu ba populasaun sira atu soe fo’er iha fo’er-fatin sira, ne’ebé governu prepara tiha ona, labele soe arbiru, hanesan iha valeta, bee-dalan no mota”, Estanislau da Silva apela.
Ministru ne’e haktuir katak bainhira fo’er tama iha tasi sei halo tasi fo’er, hamate ikan ka animál sira iha tasi laran no bele halo ema bele moras bainhira hemu tasi-been ne’e. Populasaun sira tenke iha konxiénsia no kontribui hodi hamoos ambiente atu sidade Dili sai moos.
