Konferénsia Dahuluk Veteranu sira nian hala’o iha semana ne’e
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 29 fulan-fevereiru tinan 2016
Konferénsia Dahuluk Veteranu sira nian hala’o iha semana ne’e
Veteranu no Kombatente sira Libertasaun Nasionál nian sei iha Konferénsia Nasionál boot, ba dahuluk. Organiza husi Ministériu Solidaridade Sosiál, ne’ebé sei hala’o iha loron 1 to’o 3 fulan-marsu, no propoin katak loron ikus ne’e nian sei marka hanesan loron hodi komemora Loron Veteranu sira Timor-Leste nian.
Kuadru nível aas nian sira husi Frente Armada nian hasoru-malu iha Dili, hamutuk ho elementu antigu sira husi Frente Klandestina no Frente Diplomátika Rezisténsia nian, hamutuk mós ho organizasaun populár sira, organizasaun feto sira nian no organizasaun foinsa’e sira husi Rezisténsia nian. Partisipante sira mai husi nasaun hotu, nune’e mós husi Darwin, Sydney, Melbourne, Makau, Reinu Unidu, Mosambike no Portugál. Partisipante sira besik ema 400 liu.
Governadór-Jerál Austrália nian no eis-komandante INTERFET [Forsa Pás Nasoens Unidas nian apoiu ba konsolidasaun Timor-Leste], Sr. Peter Cosgrove, sei partisipa iha loron ikus konferénsia nian, hamutuk ho Prezidente Estadu Returned Services League (RSL) iha Estadu Nova Gales Sul (Austrália), Rod White, reprezentasaun hosi Prezidente Nasionál RSL nian, no reprezentante husi Prezidente Organizasaun Feto Faluk Funu-na’in Austrália nian. Instituisaun sira ne’e fó ona apoiu ba Timor-Leste iha prosesu harii organizasaun nasionál ida Veteranu sira nian.
Konferénsia ne’e sei ko’alia kona-ba kestaun importante sira, hanesan prosesu rejistu Veteranu sira nian no konteúdu projetu Dekretu-Lei kona-ba harii Konsellu Kombatente sira Libertasaun Nasionál nian. Hala’o mós debate iha área seluk hanesan kestaun sira kona-ba interese nasionál nian, liuliu ba estabilidade no dezenvolvimentu, tanba atensaun boot ne’ebé Veteranu sira fó ona ba progresu nasaun husi sira-nia luta maka’as ba nia libertasaun.
Projetu Dekretu-Lei kona-ba harii Konsellu Kombatente sira Libertasaun Nasionál propoin ba loron 3 fulan-marsu hanesan loron Nasionál Veteranu sira nian. Loron 3 fulan-marsu tinan 1981 marka hahú reorganizasaun Rezisténsia nian, marka hanesan períodu ida ne’ebé maka defísil tebes ba luta libertasaun nasionál nian.
Portavós Governu nian, Ministru Estadu Agio Pereira, hateten katak, “konferénsia ida ne’e importante tebes atu fó onra, serbi no envolve kombatente sira ne’ebé luta ba libertasaun ita-nia país nian. Aleinde hanesan sorumutuk boot, sorumutuk ne’e sei hala’o debate sira ne’ebé importante, ne’ebé sei fó modelu ba organizasaun no funsaun ita-nia komunidade Veteranu sira nian. Ita fó omenajen ba sira hotu ne’ebé, ho forma oin-oin, kontribui tiha ona ba luta ne’e, atu ita ohin loron bele moris iha pás iha Timor-Leste ida ne’ebé livre no independente.”REMATA
