Komisaun ba Reforma Lejizlativa no Reforma Setór Justisa nian simu pose
Serimónia fó pose ba Prezidente no membru sira husi Komisaun ba Reforma Lejizlativa no Reforma Setór Justisa nian, hala’o ohin, loron 16 fulan-dezembru, iha Palásiu Governu.
Komisaun ne’e kompostu hosi Membru Permanente na’in tolu: Jorge Manuel Ferreira da Graça, nu’udar Prezidente, Henrique Corte-Real Araújo no Melisa Ibela Diliana e Silva Caldas. José Manuel Gomes Guterres, Konsellu Superiór Majistratura Judisiál maka hili hanesan Membru la Permanente.
Hetan aprovasaun iha Konsellu Ministrus, Komisaun ne’e ninia objetivu maka fó sai rekomendasaun sira ne’ebé importante no prepara relatóriu semestrál ne’ebé ajuda governu iha reforma lejizlativa nian no reforma setór justisa nian. Hein katak ho forma ida ne’e bele promove governasaun di’ak ho forma tranzversál, liuhosi enkuadramentu jurídiku ida ne’ebé koerente.
Iha nia diskursu Primeiru-Ministru, Rui Maria de Araújo, dehan “servisu ne’ebé Komisaun ne’e atu hala’o katak importante tebes no ho responsabilidade boot, tanba nia sei sujere metodolojia hirak foun ne’ebé bele hamosu dinamika foun ida, simples no modernu liu, maibé mos armonizadu.”
Serimónia fó pose ne’e konta ho prezensa husi Primeiru-Ministru, Rui Maria de Araújo no membru governu nian sira seluk, reprezentante sira husi setór judisiáriu, no mós Juís Administradór Tribunál Distritál Dili nian, Duarte Tilman, Komisariu KAK nian, Adérito Tilman, no ninia adjuntu sira no reprezentante sira hosi eskritóriu advogadu nian balun.
