Sorumutu Konsellu Ministrus nian iha loron 21 fulan-outubru tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 21 Fulan-outubru Tinan 2014
Komunikadu Imprensa
Sorumutu Konsellu Ministrus nian iha loron 21 fulan-outubru tinan 2014
Konsellu Ministrus hala’o sorumutu iha tersa-feira, loron 21 fulan-outubru tinan 2014, iha sala sorumutuk Konsellu Ministrus nian, iha Palásiu Governu, iha Dili, no aprova ona diploma hitu:
1. Alterasaun daruak ba Lei Órgaun Administrasaun Eleitorál
Iha ámbitu kuadru kreximentu no fortalesimentu instituisaun nasionál sira nian, no haree ba esperiénsia ne’ebé hetan ona iha tinan hirak ikus ne’e, importante duni atu halo ajuste atubele fó ba Komisaun Nasionál Eleisaun nian (KNE) meiu hirak ne’ebé bele fó dalan ba nia hodi dezenvolve no hala’o ninia funsaun institusionál sira ho efisiente, rasionál no efikáz.
Nune’e, Governu konsidera importante ba atuál enkuadramentu CNE nian atu iha quórum funsionamentu permanente ida ne’ebé bele estabilidade no konsolidasaun fó liután ba ninia funsaun.
2. Rezolusaun Governu nian ne’ebé aprova atribuisaun ba konstrusaun Fábrika Tratamentu Lixu nian iha Tibar ba emprenza Shun Hsin Constructions & Development, Ltd.
Iha kontinuasaun husi aprezentasaun iha sorumutuk Konsellu Ministrus nian iha loron 19 fulan-agostu, Governu avalia fila-fali implikasaun sira husi konstrusaun Fábrika Tratamentu Lixu nian ida iha Tibar, ne’ebé propoin husi empreza Shun Hsin, hodi hatudu ninia korkordánsia ho investimentu ida ne’e husi kedas inísiu.
Atu dehan sai momoos katak kreximentu populasaun nian, kreximentu sidade sira no konsumu nian, kontribui ona to’o oras ne’e hodi halo sai grave liután kondisaun ambiente nian sira, liu-liu iha zona urbana sira, tanba ne’e tenke hola medida ida urjente kona-ba tratamentu poluisaun nian. Proposta husi empreza Shun Hsin inklui la’os de’it rekolla no armazenamentu lixu, maibé mós ba tratamentu no reutilizasaun lixu orgániku sira.
3. Rezolusaun Governu nian ne’ebé aprova kriasaun Loron Nasionál Kultura Timor-Leste nian
Ohin loron Timor-Leste riku tebetebes kona-ba espresaun materiál no imateriál sira husi nia kultura, inklui koñesimentu tradisionál sira ne’ebé mak ema hatudu iha lian no dialetu oioin.
Atu selebra rikusoin no diversidade kulturál Timor-Leste nian hirak ne’e, mak hili ona loron 14 fulan-outubru, loron ne’ebé saudozu poeta Franscisco Borja da Costa moris, ne’ebé liuhusi nia poema sira - ezemplu hanesan “Pátria” (Letra Inu Nasionál Repúblika Demokrátika Timor-Leste nian) - partisipa ona iha luta ba libertasaun nasionál.
Borja da Costa moris iha loron 14 fulan-outubru tinan 1946 iha Fatu-Belak, Fatu-Berlihu. Nia aman mak Liurai Fatu-Berliu nian, António da Costa no nia inan mak Alcina da Costa, poeta ne’e mate tanba oho iha dadersan rai hun mutin loron 7 fulan-dezembru tinan 1975.
Poema hirak Borja da Costa hakerek, ninia objetivu atu sensibiliza povu ne’ebé ema haneha, maibé la haluha mós problema rejionál sira ho karater edukativu no dezenvolvimentu jerál.
Hanesan reprezentante koñesidu Kultura timoroan nian, Borja da Costa sai hanesan símbolu husi manisfestasaun kulturál oioin ne’ebé eziste iha Timor-Leste. Nune’e Loron Nasionál Kultura Timor-Leste nian tenki serbí atu hanoin hikas no fó omenajen ba nia figura, no mós sensibiliza opinianun públika nian ba nesesidade atu dignifika Kultura no artista nasionál sira, no fó omenajen, liuhusi dalan ida ne’e, ba hotu-hotu ne’ebé mak dedika an ba prátika atividade artístika no kulturál sira. Loron Nasionál Kultura nian marka importánsia Kultura nian ba dezenvolvimentu sustentável nasaun nian, no hametin valór sira kona-ba sidadania, pás no koezaun sosiál.
4. Proposta kona-ba Rezolusaun Governu nian ne’ebé aprova ratifikasaun Konvensaun ba Protesaun Patrimóniu Mundiál, Kulturál no Naturál (1973)
Proposta kona-ba Rezolusaun Governu nian ida ne’e hakarak atu Parlamentu Nasionál ratifika Konvensaun UNESCO loron 16 fulan-novembru tinan 1972, kona-ba Protesaun Patrimóniu Mundiál, Kulturál no Naturál.
Konvensaun ida ne’e ninia objetivu maka hanesan identifika, tau matan, konserva, fó valór no hatutan ba jerasaun aban-bainrua nian sira, patrimóniu kulturál no naturál ne’ebé mak eziste iha Timor-Leste, ne’ebé sai ona membru UNESCO nian ho direitu tomak husikedas tinan 2002.
Liuhusi Konvensaun ida ne’e nasaun bele mós hetan asisténsia téknika husi kooperasaun internasionál, liu-liu iha planu finanseiru, artístiku, sientífiku no tékniku.
5. Proposta kona-ba Rezolusaun Governu nian ne’ebé aprova ratifikasaun Konvensaun ba Salvaguarda Patrimóniu Kulturál Imateriál (2003)
Konvensaun ida ne’e ninia objetivu maka protesaun no salvaguarda prátika, reprezentasaun, espresaun, koñesimentu no kompeténsia sira – nune’e mós ho instrumentu, objetu, artefaktu no espasu kulturál sira ne’ebé iha ligasaun ho buat hirak ne’e – ne’ebé komunidade, grupu no, bele mós, individu rekoñese nu’udar parte husi ninia patrimóniu kulturál.
Dilpoma ne’ebé Konsellu Ministrus aprova ona ne’e propoin ba parlamentu Nasionál atu ratifika Konvensaun UNESCO nian, loron 15 fulan-outubru tinan 2003 ne’e, kona-ba Salvaguarda Patrimóniu Kulturál Imateriál.
Timor-Leste sai hanesan membru UNESCO nian ho direitu tomak husikedas tinan 2002.
6. Proposta kona-ba Rezolusaun Governu nian ne’ebé aprova ratifikasaun Konvensaun ba Protesaun no Promosaun Diversidade Espresaun Kulturál sira (2005)
Proposta kona-ba Rezolusaun Governu nian ida ne’e submete ba apresiasaun husi Parlamentu Nasionál atubele ratifika Konvesaun UNESCO nian loron 20 fulan-agostu tinan 2005, kona-ba Protesaun no Promosaun Diversidade Espresaun Kulturál sira. Akordu ida ne’e ninia objetivu maka tau-matan, habelar no respeita espresaun kulturál oin-oin ne’ebé iha, habelar interkulturalidade atu dezenvolve interasaun, no harii ponte entre povu sira, simu no tau iha prátika, polítika no medida hirak ne’ebé so’i duni ba protesaun no promosaun diversidade espresaun kulturál, iha territóriu ne’e.
Timor-Leste sai hanesan membru UNESCO nian ho direitu tomak husikedas tinan 2002.
7. Rezolusaun Governu nian kona-ba dokumentu viajen INTERPOL ninian
Organizasaun Internasionál Polísia Kriminál nian – INTERPOL, ne’ebé Timor-Leste mós sai membru, ninia objetivu prinsipál maka garantia no promosaun asisténsia ba malu ne’ebé di’ak entre autoridade polísia kriminál nian sira.
Nune’e, Estadu membru sira iha responsabildade atu halo esforsu hotu-hotu kona-ba oinsá hametin no dezenvolve mekanizmu kooperasaun nian hotu-hotu ne’ebé efetivu no lais, ne’ebé bele halo kombate ba kriminalidade ho efikáz, la sees husi desizaun hirak ne’ebé foti ona iha Asembleia Jerál, tuir artigu da-9 Konstituisaun INTERPOL nian hatete.
Iha kontestu ida ne’e, dokumentu viajen INTERPOL nian, ne’ebé adota iha Asembleia Jerál Organizasaun nian da-81, tanba fasilita funsionáriu sira INTERPOL nian, husi ninia gabinete nasionál sira ka husi autoridade nasionál polísia kriminál nian hodi tama-sai iha Estadu Membru sira, impoin nu’udar mekanizmu kooperasaun multilaterál ninian atu hodi fasilita asaun konjunta multilaterál sira kontra kriminalidade tranznasionál.
Konsellu Ministrus analiza mós aprezentasaun rua:
1. Apresentação kona-ba Misaun Ajénsia Kooperasaun Timor-Leste nian iha Gine-Bisau
Ajénsia Kooperasaun Timor-Leste nian halo pontu situasaun ida kona-ba serbisu ne’ebé hala’o ona iha Giné-Bisau, iha ne’ebé foin dadaun ne’e hala’ao eleisaun hirak ne’ebé garante tranzisaun demokrátika no estabilidade nasionál nasaun ne’e nian.
Apoiu emerjénsia nian husi Misaun Timor-Leste nian inklui área oinoin maka hanesan apoiu finanseiru hodi selu saláriu funsionáriu públiku sira nian, hamutuk ho apoiu atu garante funsionamentu insituisaun Estadu nian sira, apoiu tékniku, formasaun no akompañamentu iha área sira hanesan defeza, seguransa, komunikasaun, resenseamentu eleitorál no saúde.
Iha fulan-setembru Ajénsia Kooperasaun Timor-Leste nian entrega apoiu osan ho valór dolar millaun neen atu ajuda selu saláriu funsionáriu públiku sira nian.
2. Aprezentasaun kona-ba Sekretaria Estadu Promosaun Igualdade nia atividade sira
Sekretaria Estadu Promosaun Igualdade halo vizita ida ba distritu/munisípiu hotu-hotu atu habelar no prepara implementasaun Polítika Desentralizasaun Podér Lokál, ne’ebé sei fó ba munisípiu sira tuir faze. Objetivu prinsipál husi vizita hirak ne’e maka Harii Asosiasaun Feto Potensiál Distritál sira.
Sekretária Estadu informa mós, ba Konsellu Ministru kona-ba preparativu sira atu komemora Loron Nasionál Feto nian da-37, iha Manatutu.
