Rekursu Umanu iha Área Saúde
Rekursu Umanu mak hanesan dezafiu ida ba Ministériu Saúde. Ladún sai hanesan dezafiu boot maibé presiza promove nia formasaun, investe atu nune’e tau iha prátika koñesimentu ne’ebé hetan no kontribui ba susesu programa Planu Estratéjiku Nasionál Saúde nian.
Vise- Ministra Saúde, Madalena Hanjam, ko’alia kona-ba servisu integradu Governu nian, mak ho Ministériu Edukasaun no Universidade Nasionál Timor-Lorosa’e no Governu Kuba.
Ministériu Saúde fiar katak to’o tinan 2015, bele hetan médiku timor oan liu 1000 ne’ebé formadu iha Kuba no Timor Leste, iha tinan 2012 ho enfermeiru sira besik 100 no parteira 50 ne’ebé bele formadu ona liu husi eskola timor nian atu bele desloka ba distritu hotu-hotu hodi hala’o sira nia funsaun. Hanesan Oe-kussi Ambenu,Suai, Maliana, Maubisse, Dili no Baukau mak hanesan distritu ne’ebé atu koloka tan foin sa’e sira.
Nu’udar baibain, atu hetan remata formasaun prátika, sei koloka sira ne’ebé foin remata sira nia kursu iha distritu hotu-hotu ne’ebé iha ospitál, besik ba sira aldeia ne’ebé iha sira nia família atu bele hetan apoiu husi famiíia. Governu fó apoiu ho valór dolar 75 kada fulan ba ema na’in ida no iha projetu ba toba fatin atu bele fó ba sira kondisaun ne’ebé di’ak liután.
Sei falta buat barak porezemplu, kona-ba prátika ho ekipamentu sira ne’ebé sira uza bainhira sira sei aprende hela durante iha Kuba, maibé Ministériu Saúde fiar katak prátika ho moras sira ne’ebé mosu beibeik iha Timor-Leste bele hanesan prinsípiu di’ak ida. Hahú husi báziku, ne’ebé hanesan izemplu mak programa SISKa, informa no eduka ema sira, atu nune’e bele halo tratamentu ba moras sira ne’ebé afeta liu ba populasaun sira.
