Grupu labarik sira husi área remota vizita Palásiu Governu
Grupu ida husi labarik besik 70 husi área remota sira munisípiu nasionál nian sira hotu, ne'ebé vizita Dili, iha ámbitu Komemorasaun Aniversáriu Proklamasaun Independénsia ba Tinan 48, ohin, loron 27 Novembru 2023, sira vizita Palásiu Governu.
Labarik sira ne’e simu husi Primeiru-Ministru, Kay Rala Xanana Gusmão, akompaña husi Ministru Prezidénsia Konsellu Ministrus, Agio Pereira no Sekretáriu Estadu Komunikasaun Sosiál, Expedito Dias Ximenes."
Durante vizita, joven sira ne'e hetan oportunidade atu haree Sala Reuniaun Konsellu Ministrus iha ne'ebé desizaun importante sira ba futuru Timor-Leste nian halo iha fatin ne’e, no mós atu rona esplikasaun husi Primeiru-Ministru kona-ba funsionamentu Governu no hato'o sira-nia dúvida no sujestaun sira.
Sira mós hetan oportunidade hodi vizita área oioin iha Palásiu Governu, inklui Gabinete Primeiru-Ministru, Gabinete Fronteiras Terrestres no Marítimas, no sala reuniaun no konferénsia imprensa Prezidénsia Konsellu Ministrus nian.
Labarik 70 ne’ebé mak halo vizita mai Dili ne’e maihusi área remota sira, inklui vizita ba Prezidénsia Repúblika, Parlamentu Nasionál, Expo Tais iha Sekretaria Estadu Arte no Kultura, Arkivu-Muzeu Rezisténsia Timorense, Timor Plaza, Tasi-ibun Areia Branca no Portu Tibar.
