Governu Timor-Leste

Ministériu Solidariedade Sosiál (MSS), liuhusi Sentru Solidariedade Sosiál, Munisípiu Dili, fó apoiu emerjénsia no materiál konstrusaun nian ba família husi uma-kain 15 iha Suku Komoro Postu Administrativu Dom Aleixo, ne’ebé sira-nia uma hetan estragu tanba anin boot ne’ebé akontese iha semana kotuk, iha serimónia simbólika ida loron 14 fulan-fevereiru. Serimónia ne’e dirije hosi Vise-Ministru Solidariedade Sosiál, Miguel Marques Gonçalves “Manetelu”, ho prezensa husi Administradór Postu Dom Aleixo ho nia Xefe Suku, Xefe Aldeia sira, inklui ekipa husi MSS.

Sasán ne’ebé Ministériu Solidariedade Sosiál entrega maka kalén, simentu, besi, pregu no arame inklui sasan emerjénsia hanesan, supermi, foos nsst. Aleinde ne’e, família ida-idak sei simu mós osan hamutuk dolar amerikanu 368, ne’ebé dolar 150 atu uza ba selu ema serbisu nian o dolar 218 atu uza hodi sosa ai, no apoiu hirak ne’e iha ona prosesu nia laran.  Sasán sira ne’e vítima sira simu tuir grau estragu nian ne’ebé ekipa husi Ministériu kompetente no autoridade lokál sira avalia ona .